ԱՄՆ նախագահ Դոնալդ Թրամփը նախորդ ամիս Անկարայում կայացած ՆԱՏՕ-ի գագաթնաժողովից հետո այլ ռազմական ինքնաթիռով գաղտնի լքել է Թուրքիան, մինչդեռ Սպիտակ տունն ու նախագահի անվտանգության ծառայությունը տպավորություն են ստեղծել, թե նա գտնվում է «Air Force One» ինքնաթիռում։ Այս մասին հայտնում է «The Washington Post»-ը՝ վկայակոչելով ԱՄՆ բարձրաստիճան պաշտոնյաներին։
Ըստ հրապարակման՝ անվտանգության նման միջոցառումների պատճառը Թեհրանի կողմից Թրամփի դեմ հնարավոր մահափորձի վերաբերյալ ստացված հետախուզական տվյալներն են եղել, որոնք ի հայտ են եկել տարածաշրջանում Իրանի դեմ ԱՄՆ ռազմական հարվածների ֆոնին։
Անկարայի օդանավակայանում տեսախցիկների առջև Թրամփը բարձրացել է նախագահական «Air Force One» հիմնական ինքնաթիռը, սակայն րոպեներ անց նա և նրա մի քանի օգնականները գաղտնի դուրս են եկել ինքնաթիռի հակառակ կողմում գտնվող դռնից։ Այնուհետև Թրամփը տեղափոխվել է ավելի փոքր՝ «Air Force C-32A» ռազմական ինքնաթիռ և դրանով մեկնել Մեծ Բրիտանիայի «Mildenhall» ռազմաբազա։ «Air Force One»-ում գտնվող լրագրողներին և Սպիտակ տան աշխատակիցներին հայտարարվել է, որ նրանք թռչում են նախագահի հետ, և հրահանգվել է ցած իջեցնել պատուհանների վարագույրները։ Մեծ Բրիտանիա հասնելուց հետո միայն Թրամփը կրկին աննկատ վերադարձել է հիմնական ինքնաթիռ, որտեղից էլ լրագրողները լուսանկարել են նրա իջնելը։
Սպիտակ տան հաղորդակցության հարցերով տնօրեն Սթիվեն Չանգը չի հերքել գործողության մանրամասները՝ նշելով, որ ԱՄՆ-ն ունի բազմաթիվ թշնամիներ, որոնք նշանառության տակ են պահում նախագահին, և իրենք օգտագործում են իրենց տրամադրության տակ եղած բոլոր գործիքները՝ այդ սպառնալիքներին դիմակայելու համար։ Միևնույն ժամանակ, ԱՄՆ Սենատի դեմոկրատ անդամ Ռիչարդ Բլումենթալը դեպքն անվանել է աննախադեպ ու սարսափեցնող՝ պահանջելով հետաքննություն անցկացնել։ Ինքը՝ Թրամփը, ինքնաթիռում լրագրողների հետ զրույցում, պատասխանելով Իրանի կողմից սպառնալիքների մասին հարցին, կատակել է, թե ինքը միշտ էլ նրանց ցուցակում առաջինն է, սակայն եթե որևէ բան պատահի, լրագրողները նույնպես իր հետ են լինելու։
Հետևեք մեզ տելեգրամում
