Այս ամառ Եվրոպան ընդգրկած անոմալ շոգը սպառնում է զրոյացնել ԵՄ տարեկան տնտեսական աճը։ Էքստրեմալ շոգի և անտառային հրդեհների հասցրած վնասը կհասնի 180 միլիարդ եվրոյի, ինչը կազմում է ԵՄ ՀՆԱ-ի շուրջ 1%-ը։ Այս մասին, «Euronews»-ի փոխանցմամբ, նշվում է «Triodos» բանկի հրապարակած հետազոտության մեջ։
Բանկը շոգի տնտեսական հետևանքները դիտարկել է չորս հիմնական ուղղությամբ, որոնցից երեքը գնահատվել են ԵՄ մակարդակով։ Ըստ հետազոտության՝ հաշվի առնելով, որ այս տարի ԵՄ տնտեսության աճը կանխատեսվում է մոտ 1,1 տոկոս, դա գործնականում կնշանակի տնտեսական լճացում։
Գյուղատնտեսության արտադրողականության և կաթնամթերքի արտադրության ծավալների նվազումը, ինչպես նաև դրա հետևանքով սննդամթերքի գների աճը կարող են կազմել ՀՆԱ-ի մոտ 0,15 տոկոսը։
Ատոմակայաններում, հիդրոէլեկտրակայաններում և ջերմային էլեկտրակայաններում էլեկտրաէներգիայի արտադրության սահմանափակումը, արևային էներգիայի արտադրության արդյունավետության նվազումն ու էլեկտրաէներգիայի գների աճը կարող են ՀՆԱ-ի ևս 0,12-0,15 տոկոսի չափով վնաս պատճառել։ Երկաթուղային, ավտոմոբիլային և գետային տրանսպորտի աշխատանքների խափանումները կարող են կազմել ևս 0,15 տոկոսը։
Միևնույն ժամանակ, ամենամեծ և ամենադժվար գնահատվող ազդեցությունը կապված է աշխատուժի արտադրողականության հետ։ Աշխատողի արտադրողականությունը սկսում է նվազել, երբ ջերմաստիճանը գերազանցում է մոտ 25-30 աստիճան ցելսիուսը։ Ամենամեծ կորուստները գրանցվում են բացօթյա աշխատանքների և ծանր ֆիզիկական աշխատանքի դեպքում։ Շոգը ազդում է նաև գրասենյակային աշխատանքի վրա։
Հետևեք մեզ տելեգրամում
