Վրաստանում կառավարական քաղաք կառուցելու նախագիծ է քննարկվում

Վրաստանի իշխանությունները հատուկ հանձնաժողով են ստեղծել «Կառավարական քաղաքի» կառուցման նախագիծը մշակելու համար։ Նախագիծը նախատեսում է պետական կառույցների մի մասը Թբիլիսիի կենտրոնից տեղափոխել «Արսենալի բլուր»՝ մինչև 77 հեկտար տարածք զբաղեցնող նոր վարչական համալիր, այս մասին գրել է «NewsGeorgia»-ն։

Հանձնաժողովը կգլխավորի Վրաստանի վարչապետ Իրակլի Կոբախիձեն։ Նախատեսվում է կառուցել ընդհանուր առմամբ շուրջ 282,750 քմ նոր վարչական և գրասենյակային տարածք։

Նոր համալիր տեղափոխվելու են խորհրդարանը, կառավարության վարչակազմը, Թբիլիսիի քաղաքապետարանը, Պետական անվտանգության ծառայությունը և մի շարք նախարարություններ։ Ամենամեծ շենքը նախատեսվում է հատկացնել Թբիլիսիի քաղաքապետարանին՝ շուրջ 59,900 քմ մակերեսով, իսկ խորհրդարանի շենքը կզբաղեցնի մոտ 31,350 քմ։

Նախագծի իրականացման ժամկետներն ու ընդհանուր արժեքը դեռ հայտնի չեն։ Այս տարվա սկզբին գլխավոր հատակագծի և էսքիզային նախագծերի մշակման համար հայտարարված մրցույթը չեղարկվել էր՝ տեխնիկական առաջադրանքը վերանայելու նպատակով։

Նշենք, որ այս գաղափարը նոր չէ՝ «կառավարական քաղաքի» ստեղծման առաջարկն առաջին անգամ 2017 թվականին ներկայացրել էր այն ժամանակվա վարչապետ Գիորգի Կվիրիկաշվիլին, իսկ Կոբախիձեն նախագիծը կրկին ակտիվացրել է 2025 թվականի վերջին։