Արաբական Միացյալ Էմիրությունների պաշտպանության նախարարությունը հայտարարել է, որ Իրանի տարածքից երկրի դեմ երկու բալիստիկ հրթիռ է արձակվել : Ըստ նախարարության՝ հրթիռներից մեկն ընկել է ԱՄԷ տարածքային ջրերից դուրս, իսկ երկրորդը՝ տարածքային ջրերում: Այս մասին հայտնում է Al Jazeera-ն:
ԱՄԷ ռազմական գերատեսչությունն ընդգծել է, որ զինված ուժերը լիովին պատրաստ են դիմակայելու ցանկացած սպառնալիքի և վճռականորեն հակահարված տալու պետության անվտանգությունն ու ինքնիշխանությունը խաթարող փորձերին:
Իրանի արտաքին գործերի նախարարության պաշտոնական ներկայացուցիչ Էսմայիլ Բաղաեին, սակայն, կտրականապես հերքել է ԱՄԷ-ի պնդումները՝ դրանք անվանելով անհիմն: Բաղաեի խոսքով՝ նման հայտարարությունները հակասում են բարիդրացիության սկզբունքներին և վնաս հասցնում տարածաշրջանում վստահության ամրապնդմանն ու անվտանգության ապահովմանն ուղղված ջանքերին: Իրանական կողմը միջադեպը որակել է որպես «կեղծ դրոշի ներքո իրականացված գործողություն»:
Հրթիռային հարվածների մեղադրանքներից հետո Էմիրությունները հայտարարել է Իրանի հետ բոլոր տեսակի առևտրային, տնտեսական փոխանակումների և ֆինանսական գործարքների անժամկետ դադարեցման մասին:
Ըստ վերլուծաբանների՝ այս էմբարգոն կարող է լուրջ հարված հասցնել Իրանի տնտեսությանը: ԱՄՆ պետքարտուղարի նախկին տեղակալ, պահեստազորի գեներալ Մարկ Կիմմիտը Al Jazeera-ին տված հարցազրույցում նշել է, որ ԱՄԷ-ն հանդիսանում է Իրան ներկրվող ապրանքների ամենախոշոր մատակարարը՝ ծավալներով գերազանցելով Չինաստանին ու Թուրքիային, և Իրանի ներմուծման մոտ մեկ երրորդն անցնում է հենց Էմիրությունների տարածքով: Կիմմիտի գնահատմամբ՝ այս սահմանափակումն իր տնտեսական ազդեցությամբ կարող է գերազանցել անգամ ԱՄՆ պատժամիջոցները և էլ ավելի սրել զինված հակամարտության վտանգը:
Հետևեք մեզ տելեգրամում
