ԱՄՆ փոխնախագահ Ջեյ Դի Վենսը հայտարարել է, որ Թեհրանի նկատմամբ տնտեսական ճնշումն ԱՄՆ-ի ամենաարդյունավետ գործիքն է, սակայն ընդգծել է, որ այդ քաղաքականությունը հիշեցնում է «նուրբ պար»: Այս մասին հայտնում է CNN-ը:
Վենսը նշել է, որ երբ Վաշինգտոնը տնտեսական ճնշում է գործադրում Իրանի վրա, Թեհրանն իր հերթին փորձում է պատասխան տնտեսական քայլեր ձեռնարկել, թեև վերջին շաբաթներին իրանական կողմն անհամեմատ ավելի մեծ ճնշում է զգում:
Վենսի խոսքով՝ Իրանը փորձում է փակել Հորմուզի նեղուցը, իսկ ամերիկյան կողմի նպատակն է բավարար ծավալով նավթ ու գազ դուրս բերել տարածաշրջանից, որպեսզի թեթևացնի էներգետիկ գների ծանրությունը սպառողների համար: Նա հավելել է, որ առևտրային նավերի ուղղությամբ հարվածների համար Իրանին պատժելը լուրջ տնտեսական ճնշում է ստեղծում, ինչը փոխում է Թեհրանի հաշվարկները հնարավոր համաձայնագրի շուրջ:
Վաշինգտոնի վերջնական նպատակը, ըստ փոխնախագահի, տեղում այնպիսի իրականություն ստեղծելն է, որտեղ Իրանի միջուկային օբյեկտները ոչ միայն ոչնչացված կլինեն, այլև երկիրը երբեք չի փորձի վերականգնել իր միջուկային կարողությունները:
Անդրադառնալով համաշխարհային շուկաներում տիրող իրավիճակին՝ ԱՄՆ փոխնախագահն ընդունել է, որ նավթի գներն աճել են, ինչն ամերիկացիները զգում են բենզալցակայաններում: Այնուամենայնիվ, նա ընդգծել է, որ Սպիտակ տունը ջանքեր է գործադրում՝ Հորմուզի նեղուցով առևտրային նավերի անվտանգությունն ու էներգակիրների փոխադրումն ապահովելու ուղղությամբ:
Հետևեք մեզ տելեգրամում
