ԱՄՆ ֆինանսների նախարարությունը վերադասակարգել է լիբանանյան «Հեզբոլլահ» խմբավորման կարգավիճակը՝ նշելով, որ այն գործում է Իրանի կառավարության և Իսլամական հեղափոխության պահապանների կորպուսի (ԻՀՊԿ) «Ղոդս» հատուկ ուժերի հրամանատարության ներքո:
ԱՄՆ պաշտոնյաներից մեկը Reuters-ին հայտնել է, որ վերադասակարգման նպատակն է հստակեցնել, որ «Հեզբոլլահը» «գործում է Իրանի իշխանությունների շահերից ելնելով»:
ԱՄՆ ֆինանսների նախարարությունը նաև պատժամիջոցներ է սահմանել 10 անձի նկատմամբ, որոնք մեղադրվում են «Հեզբոլլահի» համար մաքսանենգ ճանապարհով կանխիկ միջոցներ տեղափոխելու մեջ: Գործողությունների կենտրոնում թուրք գործարար է, որը, նախարարության հայտարարության համաձայն, Թուրքիայում գործող արտարժույթի փոխանակման կետերն օգտագործել է որպես քողարկում, ինչպես նաև կեղծ ընկերություններ ու բանկային հաշիվներ է տրամադրել «Ղոդս» ուժերի հետ կապված դրամական փոխանցումների համար:
Հիշեցնենք, որ «Հեզբոլլահը» Իրանի աջակցությամբ հիմնադրվել է 1982 թվականին՝ Լիբանանի քաղաքացիական պատերազմի ընթացքում: Այն միաժամանակ հանդիսանում է և՛ քաղաքական կուսակցություն, և՛ զինված խմբավորում: Վաշինգտոնը 1997 թվականին «Հեզբոլլահին» ճանաչել է «Օտարերկրյա ահաբեկչական կազմակերպություն»:
Հետևեք մեզ տելեգրամում
