Ադրբեջանը շարունակում է տարբեր հարթակներում առաջ մղել, այսպես կոչված, «Արևմտյան Ադրբեջանի» թեզը՝ այն ներքին տեղեկատվական դաշտից տեղափոխելով նաև միջազգային և եվրոպական հարթակներ։ Այս մասին նշվում է Karabakh Records-ի X-ի էջում՝ ուշադրություն հրավիրելով Շվեդիայի մայրաքաղաք Ստոկհոլմում օրերս կազմակերպված միջոցառման վրա։
Աղբյուրի փոխանցմամբ՝ Ստոկհոլմում տեղի է ունեցել Ադրբեջանի Գիտությունների ազգային ակադեմիայի հետազոտող Զարիֆա Հագվերդիևայի «Երևան. իմ սրտում ապրող հայրենիք» գրքի շնորհանդեսը։ Միջոցառումը կազմակերպվել է Ադրբեջանի դեսպանատան, պետական կառույցների և «Շվեդիա-Ադրբեջան միության» մասնակցությամբ։
Ինչպես նշում է Karabakh Records-ը, նման միջոցառումների միջոցով փորձ է արվում Հայաստանի Հանրապետության մայրաքաղաք Երևանը ներկայացնել որպես, այսպես կոչված, «Արևմտյան Ադրբեջանի» մաս՝ պատմական իրականությունը քաղաքական նպատակներով վերաիմաստավորելով և այդ նարատիվը միջազգային լսարանին հասցնելով։
Գրառման մեջ ուշադրություն է հրավիրվում նաև այն հանգամանքի վրա, որ նման նախաձեռնություններն իրականացվում են Ադրբեջանի դիվանագիտական ներկայացուցչությունների և պետական կառույցների անմիջական մասնակցությամբ։ Սա վկայում է, որ «Արևմտյան Ադրբեջան» թեզի տարածումը ոչ թե առանձին նախաձեռնությունների շարք է, այլ համակարգված քաղաքականության և արտաքին քարոզչության մաս։
Karabakh Records-ը նաև ընդգծում է, որ մշակութային և ակադեմիական ձևաչափերի օգտագործմամբ Երևանը որպես «Արևմտյան Ադրբեջան» ներկայացնելու փորձերը միտված են ադրբեջանական պատմաքաղաքական նարատիվը միջազգային հարթակներում շրջանառելուն և աստիճանաբար քաղաքական խոսույթի մաս դարձնելուն։
«Մեկ անգամ ևս հարց է առաջանում, թե որտեղ է սկսվում և ավարտվում Ադրբեջանի պատկերացրած երկարաժամկետ խաղաղությունը տարածաշրջանում, երբ Հայաստանին մեղադրվում է հարևան երկրների նկատմամբ տարածքային հավակնություններ ունենալու մեջ, սակայն մյուս կողմից պետական-պաշտոնական մակարդակով հետևողականորեն առաջ է մղվում «Արևմտյան Ադրբեջան» կեղծ թեզը՝ փորձ անելով այն հասցնել միջազգային և միջպետական տարբեր կազմակերպություններին»,-նշվում է գրառման մեջ։
Հետևեք մեզ տելեգրամում
