Լիբանանի վարչապետ Նավաֆ Սալամն այցելել է երկրի հարավային Տյուրոս քաղաք, որտեղ հանդիպել է իսրայելական զորքերի դուրսբերումից հետո տեղակայված լիբանանցի զինծառայողներին: Այս մասին հայտնում է Լիբանանի ազգային լրատվական գործակալությունը, փոխանցում է Al Jazeera-ն:
Տյուրոսի «Բենուա Բարաքաթ» զորանոցում ունեցած ելույթում վարչապետն ընդգծել է, որ կառավարությունը ջանք չի խնայի իսրայելական ուժերի ամբողջական դուրսբերմանը հասնելու և գերիներին իրենց բնակավայրեր վերադարձնելու համար: Սալամը վստահեցրել է զինվորականներին, որ իշխանությունները միջազգային աջակցություն են մոբիլիզացնում՝ իսրայելական ագրեսիայի պայմաններում նրանց անվտանգությունն ու բարօրությունն ապահովելու նպատակով:
«Բանակի հզորացումը մեր կառավարության ծրագրում երկրորդական կամ տեխնիկական հարց չէ. դա ռազմավարական ընտրություն է, որն ընկած է մեր պետականության վերականգնման ծրագրի հիմքում»,- հայտարարել է Լիբանանի վարչապետը:
Այցին մասնակցող Լիբանանի պաշտպանության նախարար Միշել Մանսուրն իր հերթին նշել է, որ ազգային բանակը չի դադարեցնի ջանքերը, քանի դեռ չի վերականգնվել երկրի ամբողջ տարածքի նկատմամբ պետության ինքնիշխանությունը:
Հետևեք մեզ տելեգրամում
