Իսրայելի վարչապետ Բենյամին Նեթանյահուն մեկնել է Վաշինգտոն, որտեղ սեպտեմբերի 16-ին նախատեսված է «պատմական համաձայնագրի» ստորագրումն Արաբական Միացյալ Էմիրությունների և Բահրեյնի հետ:
ԱՄՆ-ի միջնորդությամբ ստորագրվող համաձայնագրի մանրամասները գաղտնի են պահվում, մինչ այս պահը մշակման փուլում են: Պարզ չէ նաև, թե արդյոք դա խաղաղության համաձայնագիր է Իսրայելի և արաբական երկրների միջև, թե պարզապես հարաբերությունները կարգավորելու վերաբերյալ համաձայնագիր:
«Այն լինելու է տաք խաղաղություն, տնտեսական խաղաղություն՝ ի լրումն դիվանագիտական խաղաղության: Խաղաղություն ազգերի միջև»,-Վաշինգտոն մեկնելուց առաջ ասել է Նեթանյահուն՝ հղում անելով Բահրեյնի թագավոր Համադ ալ-Խալիֆայի հետ հեռախոսազրույցը:
ԱՄԷ-ի և Բահրեյնի կողմից համաձայնագրերը կստորագրեն երկու երկրների արտգործնախարարները: ԵՄ միակ երկիրը, որը ներկա է լինելու արարողությանը, Հունգարիան է՝ ի դեմս ԱԳ նախարար Պետեր Սիյարտոյի:
Հիշեցնենք, որ Իսրայելը և ԱՄԷ-ը հարաբերությունները կարգավորելու մասին հայտարարեցին օգոստոսի 13-ին, ներկայում բանակցություններ են ընթանում դեսպանություններ բացելու հարցի շուրջ: Իսկ սեպտեմբերի 11-ին Բահրեյնի իշխանությունները հայտարարեցին, որ Վաշինգտոնի միջնորդությամբ Իսրայելի հետ դիվանագիտական հարաբերություններ հաստատելու մասին համաձայնություն են ձեռք բերել:
Հետևեք մեզ տելեգրամում
