Սեպտեմբերի 23-ին ՌԴ ԱԳ նախարար Սերգեյ Լավրովն ընդունել է աշխատանքային այցով Մոսկվայում գտնվող Ադրբեջանի Միլի Մեջլիսի (խորհրդարան) նախագահ Սահիբա Գաֆարովայի գլխավորած պատվիրակությանը:
ՌԴ ԱԳՆ-ի տարածած հաղորդագրության մեջ նշված է, որ հանդիպման ընթացքում կողմերը քննարկել են ինչպես ռուս-ադրբեջանական հարաբերություններին առնչվող հարցեր, այնպես էլ տարածաշրջանային անվտանգությանը վերաբերող խնդիրներ, այդ թվում Ղարաբաղյան հակամարտության կարգավորման հեռանկարները:
Նշենք, որ Ադրբեջանի խորհրդարանի մամուլի ծառայության հաղորդմամբ՝ Գաֆարովայի հետ հանդիպման ժամանակ Լավրովն իբր ասել էր, որ «Լեռնային Ղարաբաղի խնդրով Նիկոլ Փաշինյանի հայտարարությունները խանգարում են հակամարտության կարգավորմանը, և Ռուսաստանը կողմ է հինգ օկուպացված շրջանների վերադարձին, խաղաղապահների տեղակայմանը տարածաշրջանում և տրանսպորտային-կոմունիկացիոն համակարգերի վերականգնմանը»:
ՀՀ ԱԳՆ մամուլի խոսնակ Աննա Նաղդալյանը լրատվամիջոցներին տված պարզաբանման մեջ նշել է, որ հայկական կողմի համար Ադրբեջանի պաշտոնական մամուլի հաղորդագրությունները տեղեկատվության հավաստի աղբյուր չեն: «Մենք ծանոթացել ենք ՌԴ ԱԳՆ պաշտոնական հաղորդագրությանը»,-ասել է Նաղդալյանը:
Հետևեք մեզ տելեգրամում
