Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, լրագրողների հետ ամենշաբաթյա ճեպազրույցի ընթացքում անդրադառնալով ադրբեջանական կողմի տարածած Ղարաբաղյան հակամարտության վերաբերյալ հայտարարությանը, կոչ է արել հիմք ընդունել ՌԴ ԱԳՆ պաշտոնական հայտարարությունը, ոչ թե ադրբեջանական լրատվակայքերի մեկնաբանությունը:
Զախարովան նշել է, որ ՌԴ ԱԳ նախարար Սերգել Լավրովը և Ադրբեջանի Միլլի Մեջլիսի ղեկավար Սահիբա Գաֆարովայի գլխավորած պատվիրակությունը քննարկել են Ղարաբաղյան հակամարտության խաղաղ կարգավորման հարցերը, նախարար Լավրովի կողմից չի արվել նախկինում չբարձրաձայնված որևէ նոր հայտարարություն։
«Լեռնային Ղարաբաղի հակամարտության կարգավորման հարցում Ռուսաստանի դիրքորոշումը բոլորը շատ լավ գիտեն, և խնդրում եմ առաջնորդվել հենց այդ դիրքորոշմամբ, այլ ոչ թե տարբեր մեկնաբանություններով, որոնք անում է ոչ ռուսական կողմը»,- եզրափակել է Զախարովան:
Զախարովան նաև կոչ է արել հիմք ընդունել ՌԴ ԱԳՆ պաշտոնական հայտարարությունը, այլ ոչ՝ ադրբեջանական կողմի մեկնաբանությունները։ ՌԴ ԱԳՆ տարածած պաշտոնական հայտարարության մեջ 5 շրջանների վերադարձի մասին որևէ միտք առկա չէ։
Նշենք, որ Ադրբեջանի խորհրդարանի մամուլի ծառայության հաղորդմամբ՝ Գաֆարովայի հետ հանդիպման ժամանակ Լավրովն իբր ասել էր, որ «Լեռնային Ղարաբաղի խնդրով Նիկոլ Փաշինյանի հայտարարությունները խանգարում են հակամարտության կարգավորմանը, և Ռուսաստանը կողմ է հինգ օկուպացված շրջանների վերադարձին, խաղաղապահների տեղակայմանը տարածաշրջանում և տրանսպորտային-կոմունիկացիոն համակարգերի վերականգնմանը»:
ՀՀ ԱԳՆ մամուլի խոսնակ Աննա Նաղդալյանը լրատվամիջոցներին տված պարզաբանման մեջ նշել է, որ հայկական կողմի համար Ադրբեջանի պաշտոնական մամուլի հաղորդագրությունները տեղեկատվության հավաստի աղբյուր չեն: «Մենք ծանոթացել ենք ՌԴ ԱԳՆ պաշտոնական հաղորդագրությանը»,-ասել է Նաղդալյանը:
Հետևեք մեզ տելեգրամում
