Արցախի սահմանի ողջ երկայնքով սեպտեմբերի 29-ի լույս 30-ի գիշերը մարտերը շարունակվել են, սակայն ոչ նույն ինտենսիվությամբ, ինչ ընթացել էին նախորդ օրը: Այս մասին ասուլիսում հայտնեց ՀՀ ՊՆ ներկայացուցիչ Արծրուն Հովհաննիսյանը:
«Արցախի ողջ սահմանի երկայնքով շարունակել են ընթանալ գիշերային մարտեր, դրանք չեն եղել նույն ինտենսիվությամբ, ինչ ընթանում էին երեկ: Բայց տեղ-տեղ եղել են նաև հրետանային հրետակոծություններ»,-ասաց նա:
Հովհաննիսյանը հիշեցրեց, որ վաղ առավոտյան Ադրբեջանի ԶՈՒ-ն Արցախի հյուսիսային ուղղությամբ անցել են լայնածավալ հարձակողական գործողությունների, մասնավորապես ավիացիան, հրետանային և հրթիռային հարվածներ են հասցրել: Այս պահին այդ ուղղությամբ ընթանում են մարտեր:
«Հստակ պետք է ֆիքսենք, որ կիրառվում են բազում միջոցներ, այդ թվում հեռահար ճշգրիտ միջոցներ, ԱԹՍ-ներ, մեծ քանակությամբ հրետանի: Մեր ԶՈՒ ստորաբաժանումները հերոսաբար դիմակայում են: Մենք էլ ունենք զոհեր, որոնց մասին լրացուցիչ կհայտնենք: Հակառակորդը ևս կրել է կորուստներ՝ ինչպես կենդանի ուժի, այնպես էլ մասնավորապես զրահատեխնիկայի»,-ասաց Հովհաննիսյանը:
Հետևեք մեզ տելեգրամում
