Ստամբուլում ձերբակալված ռուս լրագրողները հայրենիք են վերադարձել

Ռուսական  «НТВ» հեռուստաընկերության աշխատակիցները՝ լրագրող  Ալեքսեյ Պետրուշկոն և օպերատոր Իվան Մալիշկինը, ովքեր նախորդ շաբաթ ձերբակալվել էին Ստամբուլում, վերադարձել են հայրենիք։

Այս մասին տեղեկացնում է «НТВ»-ն՝ շնորհակալություն հայտնելով լրագրողների հայտնաբերման և ազատման համար ջանքեր գործադրած կառույցներին՝ ՌԴ արտգործնախարարությանը, Անկարայում ՌԴ դեսպանությանն ու Ստամբուլում ՌԴ գլխավոր հյուպատոսարանին։

Ալեքսեյ Պետրուշկոն և Իվան Մալիշկինը ձերբակալվել էին դեկտեմբերի 3-ին, ինչից հետո հեռուստաընկերության և առհասարակ ՌԴ-ի հետ նրանց կապը որոշ ժամանակով ընդհատվել էր։ Սակայն վերոնշյալ կառույցների ջանքերով լրագրողների գտնվելու վայրը շուտով պարզվեց, իսկ դեկտեմբերի 7-ին ռուս լրագրողները թուրքական դատարանի որոշմամբ ազատ արձակվեցին։  

Նշենք, որ «НТВ»-ի «Центральное телевидение» ծրագրի լրագրող Պետրուշկոն և օպերատոր Մալիշկինը ձերբակալվել էին ռազմական ԱԹՍ-ների արտադրամասի տարածքում չարտոնված նկարահանումներ կատարելու պատճառով։ Ենթադրվում էր, որ ռուս լրագրողներին կարող են մեղադրանք առաջադրել լրտեսության հոդվածով։