Թունիսում գտնվող Թուրքիայի նախագահ Ռեջեփ Թայիփ Էրդողանը հանդիպել է այդ երկրի նախագահ Կաիս Սաիդի հետ։ Նախագահների առանձնազրույցին հաջորդել է երկու երկրների պատվիրակությունների հանդիպումը, որից հետո Էրդողանն ու Սաիդը հանդես են եկել համատեղ մամուլի ասուլիսով։
Էրդողանը իր ելույթում մասնավորապես նշել է, որ Թունիսը շատ կարևոր է տարածաշրջանային կայունության տեսակետից։ «Ես համոզված եմ, որ Լիբիայում կայունություն ապահովելու ջանքերում Թունիսը շատ կարևոր և կառուցողական դեր կարող է ունենալ», – նշել է Էրդողանը։
Անդրադառնալով Թուրքիայից Լիբիա ռազմական ուժեր ուղարկելու հավանականության մասին ավելի վաղ արված իր հայտարարությանը՝ Էրդողանը նշել է, որ Թուրքիան երբեք որևէ տեղ չի ներկայանում «անկոչ հյուրի» կարգավիճակով։ «Եթե նման հրավեր լինի, իհարկե մենք այն ծանրութեթև կանենք և համապատասխան քայլեր կձեռնարկենք», – հավելել է Թուրքիայի նախագահը։
Նա նշել է, որ իրականում բացառիկ տնտեսական գոտու հետ կապված աշխատանքները, ինչպես նաև Թուրքիա-Լիբիա համագործակցության պայմանագրում տեղ գտած հոդվածները այդ քայլի նախապատրաստական աշխատանքներն են և այդ թեմայի շուրջ որոշ քննարկումներ եղել են։
Հետևեք մեզ տելեգրամում
