IDEF 2021 պաշտպանական արդյունաբերության 15 -րդ միջազգային ցուցահանդեսին մասնակցելու նպատակով Թուրքիա մեկնած Վրաստանի պաշտպանության նախարար Ջուանշեր Բուրչուլաձեն հանդիպել է իր թուրք գործընկերոջ՝ Հուլուսի Աքարի հետ:
«Հանդիպման ժամանակ Բուրչուլաձեն շնորհակալություն է հայտնել Թուրքիայի պաշտպանության նախարարին` Վրաստանի ինքնիշխանությանը, տարածքային ամբողջականությանը և ՆԱՏՕ-ին անդամակցությանը ցուցաբերած անմնացորդ աջակցության համար և ընդգծել է Թուրքիայի տասնամյակների գործնական օգնության կարևորությունը Վրաստանի պաշտպանական ուժերի զարգացման գործում», – հայտնում են Վրաստանի ՊՆ-ում:
Կողմերը քննարկել են նաև երկկողմ և եռակողմ (Վրաստան, Ադրբեջան, Թուրքիա) ձևաչափերով համագործակցության ոլորտները:
Քննարկվել է նաև միջազգային վարժանքների կարևորությունը, միջազգային առաքելություններին համատեղ արդյունավետ մասնակցության և ՆԱՏՕ-ի հետ համագործակցության հարցերը:
Բացի այդ Պաշտպանական արդյունաբերության ու արտադրանքի IDEF-2021 միջազգային ցուցահանդեսի շրջանակներում Վրաստանի ՊՆ նախարարը հանդիպել է պաշտպանության ոլորտում թուրքական արդյունաբերական ընկերությունների ղեկավարների հետ:
ՊՆ-ից հայտնում են, որ կողմերը քննարկել են Վրաստանի ՊՆ պետական ռազմական գիտատեխնիկական «Դելտա» կենտրոնի հիման վրա համատեղ ձեռնարկությունների ստեղծման հարցը:
Հետևեք մեզ տելեգրամում
