Արցախում ՌԴ խաղաղապահ անձնակազմի հրամանատար, գեներալ-լեյտենանտ Ռուստամ Մուրադովն ավարտում է իր խաղաղապահական առաքելությունը և նրան կփոխարինեն ռոտացիայի սկզբունքով։
Sputnik Արմենիայի տեղեկություններով՝ ՌԴ խաղաղապահ անձնակազմի հավանական թեկնածուն գեներալ-մայոր Միխայիլ Կոսոբոկովն է։ Ավելի վաղ Կոսոբոկովը զբաղեցրել է 58-րդ համազորային բանակի (Հարավային ռազմական օկրուգ) հրամանատարի տեղակալի պաշտոնը։ Ժամանակին նա եղել է Աբխազիայում ռուսական ռազմական բազայի հրամանատարը։
Հիշեցնենք՝ սեպտեմբերի 6-ին Հայաստանի պաշտպանության նախարար Արշակ Կարապետյանն ընդունել է Արցախում ՌԴ խաղաղապահ անձնակազմի հրամանատար, գեներալ-լեյտենանտ Ռուստամ Մուրադովին, որն ավարտում է իր առաքելությունը անձնակազմի հրամանատարի պաշտոնում։ Նա այդ պաշտոնը զբաղեցրել է 10 ամիս։
Դեռ մայիսին նշվում էր, որ Մուրադովին ռոտացիայի սկզբունքով կփոխարինի Հարավային ռազմական օկրուգի հրամանատարի տեղակալ գեներալ-լեյտենանտ Ալեքսեյ Ավդեևը։ Սակայն հայ-ադրբեջանական սահմանի լարվածության պատճառով Մուրադովը մնաց իր պաշտոնին։
Հետևեք մեզ տելեգրամում
