Լիբանանի նախագահ Միշել Աունը և նորանշանակ վարչապետ Նաջիփ Միքաթին համաձայնության են եկել երկրի նոր կառավարության կազմի հարցում, որը կազմված կլինի 24 նախարարից։ Այդ մասին ռուսական ՏԱՍՍ լրատվական գործակալության հետ զրույցում ասել է Լիբանանի կառավարական պալատի աղբյուրը։
«Երկրի ղեկավարը կարող է հենց այսօր էլ հաստատել կառավարության կազմը և ստորագրել համապատասխան փասթաթուղթ։ Սպասվում է, որ առաջիկա ժամերին վարչապետ Միքաթին Բաաբդա պալատում կլինի», -ասել է աղբյուրը։
Աղբյուրը որոշ տեղեկություն է հայտնել նաև հնարավոր նշանակումների վերաբերյալ։ Ըստ այդմ՝ սպասվում է, որ ԱԳՆ ղեկավարի պաշտոնը պետք է զբաղեցնի Աբդալլա Բու Հաբիբը (քրիստոնյա մարոնիտ), ՊՆ ղեկավար կլինի Մորիս Սլիմը (ուղղափառ քրիստոնյա), ֆինանսների նախարարի պաշտոնը կստանձնի Յուսեֆ Հալիլ, իսկ ՆԳՆ-ի ղեկավար կնշանակվի սյունիական համայնքի պաշտոնաթող գեներալ Մարվանա Զեյնան։
Նշվում է, որ կառավարության կազմի հետաձգման հարցի գլխավոր պատճառն այն է, որ լիբանանական իշխանությունները չէին կողմնորոշվում, թե ում նշանակել ֆինանսների նախարարի պաշտոնում։
Հիշեցնենք, որ Լիբանանի կառավարությունը հրաժարական էր տվել նախորդ տարի օգոստոսին Բեյրութի նավահանգստում տեղի ունեցած հզոր պայթյունից հետո։ Թեև Լիբանանում մի քանի անգամ փորձ է արվել ձևավորել նոր կառավարություն, սակայն բոլոր փորձերը ձախողվել են։ Կառավարության հրաժարականից շուրջ մեկ տարի անց հնարավոր է, որ օգոստոսին վարչապետ նշանակված Միքաթիի գլխավորությամբ Լիբանանը նոր կառավարություն ունենա:
Հետևեք մեզ տելեգրամում
