Թուրքիայում հերթական անգամ արտասահմանցի է սպանվել։ Թուրքական մամուլի հավաստմամբ՝ վերջին շրջանում երկրում նմանատիպ դեպքերի թվի կտրուկ աճ է գրանցվել։ Վերջին դեպքը տեղի էր ունեցել 2019թ․ նոյեմբերին, երբ Ստամբուլում հայտնաբերվել էր Անգլիայի հետախուզության նախկին սպա Ջեյմս Գուստաֆ Էդվարդ լե Մեսուրիերի դին։
Իսկ այսօր՝ հունվարի 14-ին, գտնվել է 4 ամիս առաջ Թուրքիայում անհետ կորած իրաքցի մի գործարարի դին։ Մաջիդ Քարիմ Թուաման Իրաքի Էն Նաջաֆ քաղաքից էր, նա անշարժ գույք ձեռք բերելու նպատակով 2019թ․ սեպտեմբերի 7-ին մեկնել էր Ստամբուլ՝ իր հետ տանելով 80․000 դոլար։ Գործարարը պայմանավորվածություններ էր ձեռք բերել Ստամբուլի տարբեր շրջաններում 840․000 դոլար ընդհանուր արժողությամբ 5 բնակարան գնելու վերաբերյալ։ Սակայն օրեր անց անհետ կորել էր։
Գործարարի անհետացումից հետո Թուրքիա ժամանած նրա հարազատների դիմումի հիման վրա ոստիականությունը որոնողական աշխատանքներ է սկսել։ Անվտանգության տեսախցիկների օգնությամբ պարզվել է, որ սեպտեմբերի 10-ին Թուաման սրճարանում հանդիպել է մի օտարերկրացու հետ, որից հետո անհետացել է։ Ոստիկանությունը ձերբակալել է նշված օտարերկրացուն և ևս 5 կասկածյալի։ Վերջիններս խոստովանել են, որ իրենք են սպանել իրանցի գործարարին և հայտնել են, որ սպանված դին թաղել են Չաթալջայի անտառային տարածքում։
Հետևեք մեզ տելեգրամում
