2020-ի նոյեմբերի 9-ին եռակողմ հայտարարության ստորագրման տարելիցի կապակցությամբ Ռուսաստանի արտաքին գործերի նախարարությունը հանդես է եկել հայտարարությամբ, որը տեղադրված է ՌԴ ԱԳՆ պաշտոնական կայքում։
ՌԴ ԱԳՆ–ն շեշտում է հայ–ադրբեջանական պետական սահմանին լարվածությունը նվազեցնելու կարևորությունն ու դեմարկացիային (սահմանազատում) հաջորդող դելիմիտացիայի (սահմանագծում) գործարկումը։
ՌԴ ԱԳՆ հայտարարության մեջ ասվում է, որ Մոսկվան ամեն կերպ կնպաստի Ադրբեջանի և Հայաստանի հարաբերությունների կարգավորմանը, կաջակցի Հարավային Կովկասում կայունությունն, անվտանգությունը և տնտեսական զարգացումն ապահովելու հարցերի լայն շրջանակի վերաբերյալ բոլոր մակարդակներում շփումների ընդլայնմանն ուղղված խաղաղ նախաձեռնություններին։
«Շեշտում ենք հայ–ադրբեջանական պետական սահմանին լարվածությունը նվազեցնելու կարևորությունն ու դրա հետագա սահմանազատմամբ սահմանագծման գործընթացի շուտափույթ գործարկումը։ Պատրաստ ենք ցուցաբերել անհրաժեշտ խորհրդատվական աջակցությունը», – ասվում է հաղորդագրության մեջ։
ՌԴ ԱԳՆ–ում կարևոր են համարում շարունակել ջանքերը ԵԱՀԿ ՄԽ համանախագահների ձևաչափով, նախևառաջ տարածաշրջանի առաջ կանգնած սոցիալ–տնտեսական և մարդասիրական խնդիրների լուծման համատեքստում։ Պահանջված է նաև Կարմիր խաչի միջազգային կոմիտեի, ՄԱԿ–ի գերագույն հանձնակատարի գրասենյակի, ՅՈւՆԵՍԿՕ–ի և ոլորտային այլ միջազգային կազմակերպությունների ներդրումը։
«Պատրաստ ենք նաև ՌԴ մասնակցությամբ աջակցել Ադրբեջանի Հանրապետության և Հայաստանի Հանրապետության հանրության ներկայացուցիչների երկխոսությանը` հայ և ադրբեջանցի ժողովուրդների միջև վստահության մթնոլորտ ձևավորելու նպատակով։ Հանդես ենք գալիս հանուն Հարավային Կովկասի երկրների և նրա հարևանների միջև բարիդրացիական հարաբերությունների կառուցման, փոխշահավետ տարածաշրջանային համագործակցության զարգացման», – ասվում է հայտարարության մեջ։
Համաձայն ՌԴ ԱԳՆ հայտարարության՝ 2020 թվականի նոյեմբերի 9-ի հայտարարության մեջ ամրագրված պայմանավորվածություններն ընդհանուր առմամբ կատարվում են։ Միևնույն ժամանակ կարևոր է, որ Բաքուն և Երևանը հավատարիմ են դրա բոլոր դրույթների հետագա իրականացմանն ու անվերապահ պահպանմանը։
«2020 թվականի նոյեմբերի 9-ի հայտարարության համաձայն` տեղակայված ՌԴ խաղաղապահ զորախումբը իր էական ներդրումն ունի տարածաշրջանում իրավիճակի կայունացման և անվտանգությունն ապահովելու գործում։ Դա գնահատում են մեր ադրբեջանցի և հայ բարեկամները։ 2020 թվականի դեկտեմբերի 2-ից ռուս խաղաղապահների մասնակցությամբ ընդհանուր առմամբ վերադարձվել է գերության մեջ պահվող 122 զինծառայող։ Դրանցից Հայաստանին են վերադարձվել 105-ը, Ադրբեջանին` 17-ը։ Միևնույն ժամանակ ադրբեջանական կողմին է փոխանցվել ականապատ դաշտերի քարտեզների 3 փաթեթ»։
Ռուսաստանի խաղաղապահ զորախումբն ակտիվ մասնակցություն է ցուցաբերում խաղաղ կյանքի ապահովման հարցում։
ՌԴ ԱԳՆ–ում բարձր են գնահատում եռակողմ աշխատանքային խմբի գործունեությունը` ընդգծելով շահերի հավասարակշռության վրա հիմնված կոնկրետ նախագծերի շուտափույթ գործարկման անհրաժեշտությունը, ինչը կնպաստի Հարավային Կովկասի տնտեսական և տրանսպորտային ներուժի բացահայտմանը։
Հետևեք մեզ տելեգրամում
