Նոյեմբերի 9-ին Արաբական Միացյալ Էմիրությունների բարձրաստիճան պատվիրակությունն արտգործնախարար շեյխ Աբդուլլահ բըն Զայեդի գլխավորությամբ մեկնել է Դամասկոս, գրում է Al Arabiya-ն: Սա 10 տարվա ընթացքում ԱՄԷ արտգործնախարարի առաջին այցն է Սիրիա:
Համաձայն Սիրիայի նախագահի աշխատակազմի հրապարակած հայտարարության՝ Սիրիայի նախագահ Բաշար Ասադը Դամասկոսում ընդունել է Էմիրությունների ԱԳ նախարարին և նրան ուղեկցող պատվիրակությանը: Կողմերը քննարկել են երկկողմ հարաբերություններին, տարբեր ոլորտներում երկկողմ համագործակցությանն առնչվող մի շարք հարցեր:
Սիրիայի նախագահը բարձր է գնահատել ԱՄԷ-ի որդեգրած «անաչառ և ճշգրիտ դիրքորոշումը»՝ շեշտելով, որ «ԱՄԷ-ն միշտ Սիրիայի ժողովրդի կողքին է եղել»:
ԱՄԷ ԱԳ նախարարն էլ իր հերթին վերահաստատել է Էմիրությունների աջակցությունը Սիրիային և նրա ժողովրդին երկրում կայունության պահպանման համար՝ հավելելով, որ «այն ինչ կատարվում է Սիրիայում, ազդում է արաբական բոլոր երկրների վրա»: Նա նաև հայտարարել է, որ Սիրիան նախագահ Բաշար Ասադի ղեկավարությամբ վստահաբար կարող է հաղթահարել պարտերազմի առաջացրած բոլոր մարտահրավերները:
Կողմերը քննարկել են նաև տարածաշրջանային մի շարք հրատապ հարցեր:
Հիշեցնենք, որ Սիրիայի քաղաքացիական պատերազմի բռնկումից ի վեր՝ ավելի քան 10 տարի Սիրիայի և ԱՄԷ-ի միջև բացակայել են բարձրաստիճան մակարդակի շփումները: Դեռևս 2012 թվականի փետրվարին ԱՄԷ-ն և Պարսից Ծոցի համագործակցության խորհրդի երկրներն իրենց դեսպաններին հետ էին կանչել Դամասկոսից՝ իշխող վարչակարգին մեղադրելով անպաշտպան քաղաքացիների նկատմամբ զանգվածային արյունահեղություն իրականացնելու մեջ: Միայն 2018 թվականի դեկտեմբերին ԱՄԷ-ն հայտարարել էր, որ դեսպանատան վերաբացումը արտահայտում է Էմիրությունների պատրաստակամությունը՝ վերականգնելու երկու եղբայրական պետությունների միջև բնականոն հարաբերությունները: Իսկ արտգործնախարարի այցին նախորդել էր ընթացիկ տարում հոկտեմբերի 20-ին Աբու Դաբիի թագաժառանգի և Սիրիայի նախագահի հեռախոսազրույցը:
Հետևեք մեզ տելեգրամում
