Սիրիայի արաբական բանակը նոյեմբերի 11-ին հայտնել է, որ ամերիկյան զինված ուժերի մեքենաների ավտոշարասյուն է նկատել և արգելել մտնել Հասաքա նահանգի Կամիշլի քաղաքը, գրում է SANA-ն:
Տեղական աղբյուրները հաղորդել են SANA-ին, որ ամերիկյան զինված ուժերին պատկանող հինգ ռազմական մեքենաներ փորձել են Կամիշլի քաղաք մտնել Ալ-Վաֆա շրջանաձև երթևեկության խաչմերուկով, սակայն Սիրիայի արաբական բանակը քաղաքի հարավ-արևմուտքում գտնվող Ռաշոյի անցակետում նկատել է ավտոշարասյունը, ստիպել նահանջել և վերադառնալ ելման դիրքեր:
Նշենք, որ Սիրիայի արևելյան ու հյուսիս-արևելյան մի շարք շրջաններ ներկայում կառավարվում են քրդական ուժերի կողմից: Իսկ Al Hadath-ի հաղորդմամբ՝ նոյեմբերի 10-ին Կամիշլի քաղաքում թուրքական անօդաչու թռչող սարքի հարվածի հետևանքով մահացել էր երեք խաղաղ բնակիչ: Հարվածի թիրախում եղել էր քրդական «Սիրիայի դեմոկրատական ուժեր»-ի ներկայացուցիչներից մեկը: Հրթիռակոծությանը հետևել էին զանգվածային բողոքի ցույցեր Կամիշլիում՝ ի նշան թուրքական զինված ուժերի գործողությունների:
Հետևեք մեզ տելեգրամում
