Թեհրանն ու Անկարան պետք է արագորեն վերացնեն բոլոր հնարավոր խոչընդոտները, որոնք առկա են երկու երկրի հարաբերություններում: Այս մասին հայտարարել է Իրանի ԱԳ նախարար Հոսեյն Ամիր Աբդոլլահիանը՝ թուրք պաշտոնակցի հետ հանդիպման ավարտին կայացած համատեղ ասուլիսում, գրում է իրանական Mehr-ը:
Աբդոլլահիանը հույս է հայտնել, որ Թուրքիայի նախագահ Ռեջեփ Թայիփ Էրդողանի՝ Իրան կատարելիք ապագա այցի ժամանակ կողմերը վերջնական տեսքի կբերեն երկարատև համագործակցության ճանապարհային քարտեզը:
«Պայամանվորվել ենք բանակցություններ սկսել երկու երկրի միջև երկարաժամկետ համագործակցության ճանապարհային քարտեզի շուրջ, և հուսով ենք, որ այդ փաստաթուղթը կտորագրվի երկու նախագահի կողմից Թուրքիայի նախագահ Էրդողանի՝ առաջիկա այցի ժամանակ»,- ասել է իրանցի նախարարը:
Թուրքիայի ԱԳ նախարար Մևլյութ Չավուշօղլուն, իր հերթին, անդրադարձել է տարածաշրջանային հարցերով համագործակցությանը:
«Մենք քննարկել ենք նաև տարբեր հարցեր, որոնք առնչվում են անօրինական միգրացիային, մաքսանենգությանն ու սահմանային խնդիրներին: Ներկայում երկու երկիրը համագործակցում են ոչ միայն երկկողմ հարցերի շուրջ, այլև տարածաշրջանային հիմնախնդիրների, ինչպես օրինակ՝ Աֆղանստանի, Իրաքի և Հարավային Կովկասի տարածաշրջանում կայունության հարցերի շուրջ, և մենք պատրաստ ենք համագործակցել Իրանի հետ «3+3» առաջարկված ձևաչափի շրջանակում»,- ասել է Չավուշօղլուն:
Հետևեք մեզ տելեգրամում
