Իրանի միջուկային ծրագրի շուրջ Վիեննայի բանակցություններում համաձայնության հասնելու վերաբերյալ ԱՄՆ-ի վերջնաժամկետը սահմանելու է «շաբաթների» ընթացքում: Այս մասին հայտնել է ԱՄՆ ազգային անվտանգության խորհրդական Ջեյք Սալիվանը իսրայելական Haaretz daily-ին տված հարցազրույցում:
Սալիվանը նշել է, որ Թեհրանի միջուկային ծրագիրը զսպելու համար «դեռ դիվանագիտական ջանքերի հնարավորություններ կար», սակայն ըստ նրա՝ իրական արդյունքներ գրանցելու համար ժամանակահատվածը «երկարատև չէ»:
Նշենք, որ օրեր առաջ Սալիվանը ժամանել էր Իսրայել, որտեղ հանդիպել էր նախագահ Իսաակ Հերցոգի, վարչապետ Նաֆթալի Բեննեթի և այլ բարձրաստիճան պաշտոնյաների հետ: Այցի շրջանակներում քննարկվել են Իրանի միջուկային ծրագիրը և այլ ռազմավարական հարցեր:
Ավարտելով պաշտոնական այցը Իսրայել՝ Սալիվանը մեկնել է Ռամալլահ, որտեղ հանդիպել է Պաղեստինյան ինքնավարության առաջնորդ Մահմուդ Աբբասի հետ:
Ինչպես հաղորդում է պաղեստինյան Wafa լրատվական գործակալությունը, այցի ընթացքում Սալիվանն հաստատել է, որ Վաշինգտոնը հավատարիմ է «երկու պետություն» սկզբունքով իսրայելապաղեստինյան հակամարտության լուծմանը:
Հատկանշական է, որ վերջին 10 օրերի ընթացքում սա երրորդ հանդիպումն էր Աբբասի և Բայդենի վարչակարգի բարձրաստիճան պաշտոնյայի միջև:
Հետևեք մեզ տելեգրամում
