Հունվարի 5-ի վաղ առավոտյան Բաղդադի միջազգային օդանավակայանին հարակից Ջիհադ թաղամասից «Կատյուշա» տեսակի չորս հրթիռներ են արձակվել օդանավակայանի ուղղությամբ։ Հարձակման վերաբերյալ այլ մանրամասներ չի հաղորդվել։
Տեղական աղբյուրները վկայում են, որ հրթիռները թիրախավորել են «Վիկտորիա» ռազմաբազան, որտեղ տեղակայված են ԱՄՆ-ի զինված ուժերը։
Ժամեր անց ԱՄՆ-ի գլխավորած միջազգային կոալիցիայի պաշտոնյան հաղորդել է, որ Իրաքի ՀՕՊ համակարգը խոցել է երկու անօդաչուներ, որոնք Այն Ալ-Ասադ ավիաբազային էին մոտենում (ռազմաբազան գտնվում է Անբար նահանգում, որտեղ էլ ԱՄՆ զինված ուժերն են տեղակայված)։
Հատկանշական է, որ երկուշաբթի Իրաքի անվտանգության ծառայությունը հաղորդել էր, որ երկրի ՀՕՊ-ը խոցել էր երկու անօդաչուներ, որոնք դարձյալ ուղղված էին Վիկտորիա ռազմաբազայի ուղղությամբ։ Հարձակումը համընկել էր Իրանի իսլամական հեղափոխության պահապանների «Ղոդս» ստորաբաժանման հրամանատար, գեներալ Ղասեմ Սոլեյմանիի սպանության երկրորդ տարելիցի հետ։
Հետևեք մեզ տելեգրամում
