Իրաքի խորհրդարանի նախկին խոսնակ Մուհամմադ Ալ-Հալբուսիի գլխավորած «Թակադում» (թարգմ․՝ առաջընթաց) և Խամիս Ալ-Խանջարիի «Ազմ» (թարգմ․՝ վճռականություն) դաշինքները հունվարի 5-ին հայտարարել են սուննի նոր կոալիցիայի կազմավորման մասին, որտեղ ընդգրկված են լինելու 64 պատգամավորներ։ Դաշինքը կազմավորվել է Իրաքի նոր խորհրդարանի առաջին նստաշրջանին ընդառաջ, որը կայանալու է հունվարի 9-ին։
Հատկանշական է, որ Իրաքում խորհրդարան անցած կուսակցությունները դաշինքներ ձևավորելու համար հաճախ բանակցություններ են վարում՝ նախապատրաստվելով խորհրդարանի առաջին նիստին։
Շիա կուսակցությունները դեռևս հեռու են մեծ դաշինք կազմելուց, որը կներառեր բոլոր շիա ուժերին։ Շիայական կուսակցությունները պարտություն էին կրել ընտրություններում և չէին ճանաչում արդյունքները։ Ի հակադրություն «Ալ-Սադր շարժում» կուսակցությանը, որը ազգային մեծամասնական կառավարության կազմավորման կողմնակից է, շիայական ուժերի մեծամասնությունը կողմ է կոնսենսուսային կառավարության ձևավորմանը, որը նման կլինի 2003 թվականից ի վեր ձևավորված կառավարություններին։
Ինչ վերաբերում է քրդական կուսակցություններին, ապա Մասուդ Բարզանիի գլխավորած «Քուրդիստանի դեմոկրատական կուսակցության» և Բաֆել Թալաբանիի՝ «Քուրդիստանի հայրենասիրական միություն» կուսակցության միջև տեսակետների տարբերություն կա, հետևաբար Իրաքի նոր խորհրդարանում նրանք կներկայանան որպես ընդդիմադիր ուժեր՝ մոտ 40 պատգամավորներով։
Նշենք, որ ըստ Իրաքի սահմանադրության՝ խորհրդարանի առաջին նիստը ղեկավարելու է ամենատարեց պատգամավոր Մահմուդ Ալ-Մաշհադանին, ով 2003 թվականին երկրի սահմանադրության մշակման հանձնաժողովի անդամ է եղել (նա 74 տարեկան է)։
Համաձայն Իրաքի սահմանադրության՝ խորհրդարանի նախագահը և նրա երկու տեղակալները պետք է ընտրվեն 15 օրվա ընթացքում խորհրդարանի անդամների բացարձակ մեծամասնությամբ, ինչը նշանակում է՝ ստանալ խորհրդարանի երկու երրորդ մեծամասնությունը: Եթե նման մեծամասնությունը հնարավոր չէ ապահովել առաջին քվեարկության ժամանակ, ապա քվեարկությունը կրկնվում է, սակայն այս անգամ թեկնածուները պետք է ստանան խորհրդարանի անդամների (329 մանդատների) կեսի համաձայնությունը՝ այսինքն 165+1 ձայներ։
Հիշեցնենք, որ Իրաքի խորհրդարանական ընտրությունները կայացել են 2021 թվականի հոկտեմբեր 10-ին։ Նոյեմբերի 30-ին Իրաքի ընտրական բարձրագույն հանձնաժողովը հրապարակել էր ընտրությունների վերջնական արդյունքները, համաձայն որոնց՝ Մուքթադա Ալ-Սադրի գլխավորած «Ալ-Սադր» բլոկը հաղթել էր ամենաշատ տեղերը խորհրդարանում. 329 պատգամավորական մանդատներից այն ստացել 73 մանդատ: Հաջորդը խորհրդարանի նախկին խոսնակ Մուհամմադ Ալ-Հալբուսիի գլխավորած «Առաջընթաց» կուսակցությունն էր՝ 37 պատգամավորական մանդատով: «Օրենքի երկիր» կոալիցիան՝ նախկին վարչապետ Նուրի Ալ-Մալիքիի գլխավորությամբ հաղթել էր 33 պատգամավորական մանդատ:
Հետևեք մեզ տելեգրամում
