Ադրբեջանի իշխանությունների կողմից հնչող բոլոր խաղաղասիրական հայտարարությունները կեղծ են: Այս մասին մամուլի ասուլիսում հայտարարել է Մարդու իրավունքների պաշտպան Արման Թաթոյանը:
«Դրանք կեղծ շղարշ են միջազգային հանրության համար, իրենց իրական դեմքը քողարկված պահելու նպատակով: Մենք ունեցել ենք այս նույն իրավիճակները 2016 թվականին, 2017 թվականին: Վերջերս Արցախի մարդու իրավունքների պաշտպանի հետ հրապարակեցինք հատուկ զեկույց, որում փաստերով ներկայացվել էր, որ այդ կեղծ հայրենասիրական կոչերն են առկա»,- ընդգծել է Թաթոյանը:
Թաթոյանը հորդորել է ուսումնասիրել, թե գործնականում ինչ է տեղի ունենում: Նա նշել է, որ գրեթե ամեն օր մեր սահմանային բնակիչների իրավունքները խախտվում են, սպանվում են խաղաղ բնակիչներ, զինծառայողներ, նրանց կողմից կատարվում են գողություններ, սպառնալիքներ, գերիների հանդեպ խոշտանգումներ:
«Դրանք բոլորը ապացույցներով հիմնավորված են»,- ասել է ՄԻՊ-ը:
Արման Թաթոյանն ընդգծել է, որ Ադրբեջանի հայատյացության քաղաքականությունը պատերազմից հետո մի գրամ անգամ չի նվազել:
«Ինձ, որպես Մարդու իրավունքների պաշտպանի, խաղաղությունը կարևորագույն և բարձագույն արժեք է, բայց գիտեք, երբ մեր իրավունքների պաշտպանության երաշխիք չունենք, կարող ենք ավելի մեծ խնդիրների առջև կանգնել: Ուզում եմ նշել, որ գլխավոր երաշխիքը ադրբեջանական զինված ծառայողների հեռացումն է սահմանից, որը մենք պետք է հիմնավորենք մարդու իրավունքների պաշտպանության մեխանիզմներով»,- ընդգծեց Թաթոյանը:
Հետևեք մեզ տելեգրամում
