Հունվարի 12-ին Չինաստանն ու Սիրիան «Մետաքսի ճանապարհ տնտեսական գոտու» և «Ծովային մետաքսի ճանապարհ» նախաձեռնության շրջանակներում ստորագրել են փոխըմբռնման հուշագիր: Այն ստորագրել են Միջազգային համագործակցության և պլանավորման հանձնաժողովի նախագահ Ֆադի Ալ-Խալիլը և Դամասկոսում Չինաստանի դեսպան Ֆենգ Բիաոն:
Ըստ հուշագրի՝ Սիրիան միանալու է այս նախաձեռնությանը, որը հնարավորություն կտա զարգացնել Չինաստանի և նախաձեռնության գործընկեր այլ երկրների հետ համագործակցությունը մի շարք ոլորտներում՝ այդ թվում ապրանքների, տեխնոլոգիայի և կապիտալի փոխանակության:
Ֆադի Խալիլն ընդգծել է, որ այս նախաձեռնության շնորհիվ ընդլայնվելու է Սիրիայի և Չինաստանի միջև համագործակցությունը տարբեր ոլորտներում՝ մասնավորապես ենթակառուցվածքների վերակառուցման, էլեկտրական հզորության և այլընտրանքային էներգիայի համատեքստում:
Չինաստանի դեսպանն իր հերթին նշել է, որ այս նախաձեռնությունը նպաստելու է Սիրիայի տնտեսական վերակառուցմանը և սոցիալական զարգացմանը՝ նշելով, որ այն աշխարհում միջազգային համագործակցության ամենալայն հարթակն է (150 երկրներ և 32 կազմակերպություններ արդեն միացել են նախաձեռնությանը):
Նշենք, որ Չինաստանը 2013 թվականին սկսել է «Մետաքսի ճանապարհ տնտեսական գոտի» և «Ծովային մետաքսի ճանապարհ» նախաձեռնությունը, որի նպատակն է աշխարհի տարբեր երկրներին միմյանց միացնել ցամաքային ճանապարհների, երկաթուղիների, նավահանգիստների, նավթամուղների և հեռահաղորդակցության ցանցերի միջոցով, որոնք անցնում են Չինաստանով և մի քանի այլ երկրներով:
Նախաձեռնությունը բաղկացած է երկու ճյուղից. առաջինը «Մետաքսի ճանապարհի տնտեսական գոտին» է, որի նպատակն է Չինաստանը կապել Եվրոպայի հետ՝ անցնելով Հարավային Ասիայի և Կենտրոնական Ասիայի միջով, իսկ երկրորդը՝ «Ծովային Մետաքսի ճանապարհը», որի նպատակն է կապել Չինաստանը Եվրոպայի հետ՝ անցնելով Հարավարևելյան Ասիայի, Մերձավոր Արևելքի և Հյուսիսային Աֆրիկայի միջով:
Հետևեք մեզ տելեգրամում
