Իսրայելի նախագահ Իսաակ Հերցոգը հնարավոր է մոտ ապագայում այցելի Թուրքիա: Նա կլինի առաջին նախագահը, ով կայցելի Թուրքիա վերջին 15 տարիների ընթացքում (վերջին անգամ 2007 թվականին Իսրայելի նախագահ Շիմոն Պերեսն էր մեկնել Թուրքիա):
Հունվարի 18-ին Թուրքիայի նախագահ Էրդողանը հայտարարել է, որ Հերցոգը շուտով հնարավոր է այցելի Թուրքիա:
«Մենք հիմա բանակցում ենք նախագահ Հերցոգի հետ: Հնարավոր է նա այցելի Թուրքիա: Վարչապետ Բեննեթը նույնպես դրական մոտեցում ունի»,- ասել է Էրդողանը:
Իսրայելցի բարձրաստիճան պաշտոնյան հայտնել է Ynet-ին, որ կողմերի միջև բանակցություններ են ընթանում Հերցոգի հնարավոր այցի կազմակերպման հետ կապված, սակայն դեռ «հստակ որոշում չկա, որ այն կկայանա»:
Նշենք, որ Իսրայելի և Թուրքիայի միջև հարաբերությունները շարունակում էին մնալ լարված վերջին շրջանում: Իսրայելը և մի խումբ երկրներ, այդ թվում Թուրքիայի պատմական թշնամի Հունաստանը, աշխատում էին համատեղ գազամուղի կառուցման աշխատանքների ուղղությամբ՝ Արևելյան Միջերկրական ծովից գազը Եվրոպա հասցնելու համար: Թուրքիան կտրականապես դեմ է եղել այս նախագծին և գազամուղի կառուցման համար առաջադրել է իր սեփական տարածքային հավակնությունները:
Գազամուղի աշխատանքներին աջակցում էր նաև ԱՄՆ նախկին նախագահ Դոնալդ Թրամփի վարչակազմը: Սակայն իսրայելական և այլ լրատվամիջոցները հաղորդում են, որ Ջո Բայդենի իշխանության գալուց հետո Վաշինգտոնը այլևս չի սատարում այս նախագծին, որովհետև այն տարածաշրջանային լարվածություններ է առաջացնում:
«Եթե Իսրայելի գազը արտահանվելու է Եվրոպա, ապա այն միայն կատարվելու է Թուրքիայի միջոցով»,- հայտարարել է Էրդողանը:
Հիշեցնենք նաև, որ թուրք-իսրայելական հարաբերությունները լարվել էին 2010 թվականին «Մավի Մարմարա» նավի միջադեպից հետո: Անկարան տեղի ուենցածի կապակցությամբ իր դեսպանին հետ էր կանչել Թել Ավիվից: Թուրքիան Իսրայելից պահանջում էր պաշտոնապես ներողություն խնդրել և փոխհատուցել զոհվածների ընտանիքներին, իսկ Իսրայելը պնդում էր, որ իր զինված ուժերը գործել են միջազգային օրենքներին համապատասխան, տեղեկացնում է Ermenihaber-ը:
Հետևեք մեզ տելեգրամում
