Հունվարի 24-ին Բեյրութի Բաաբդա պալատում Լիբանանի կառավարության նիստ է գումարվել եռամսյա դադարից հետո:
Միշել Աունը նախագահել է նիստը, այնուհետև հանդիպել է վարչապետ Նաջիբ Միկաթիի հետ:
«Այն, ինչ կատարվեց նախորդ երեք ամիսների ընթացքում իշխանության բաժանման հետ ոչ մի աղերս չունի»,- հայտարարել է Աունը:
Նա նաև ավելացրել է, որ կառավարության եռամսյա դադարը ազդել է քաղաքացիների կենսապայմանների և գործադիր իշխանության աշխատանքի վրա՝ վատթարացնելով իրավիճակը:
Նշենք, որ վարչապետ Նաջիբ Միկաթիի կառավարությունը ձևավորվել էր նախորդ տարի սեպտեմբերին: Իսկ հոկտեմբերի 14-ից ի վեր կառավարության նիստ չի գումարվել: Պատճառը շիայական երկու կուսակցությունների՝ «Հեզբոլլահի» և «Ամալի» պահանջն էր հեռացնել Բեյրութի նավահանգստի պայթյունը հետաքննող դատավոր Թարեք Բիթարին, որին մեղադրում էին հետաքննությունը քաղաքականացնելու մեջ: Իսկ հունվարի 15-ին շիայական այս կուսակցությունները հայտարարեցին, որ դադարեցնում են կառավարության նիստերի բոյկոտը և վերադառնում են աշխատանքներին` «հաշվի առնելով քաղաքացիների կարիքները» և «լիբանանցիների կենսապայմանները»:
Հետևեք մեզ տելեգրամում
