Իրաքի զինված ուժերը ավիահարվածներ են հասցրել «Իսլամական պետություն» ահաբեկչական կազմակերպության ահաբեկիչների թաքստոցի ուղղությամբ: Հարվածների հետևանքով սպանվել են ինը ահաբեկիչներ:
Ավելի վաղ տեղեկացրել էինք, որ հունվարի 21-ին Իրաքում ԻՊ զինյալները ներխուժել էին Բաքուբա քաղաքից դուրս գտնվող լեռնային Ալ-Ազիմ թաղամասի զորանոց, սպանել անվտանգության աշխատակցին և քնած ժամանակ կրակել 11 զինվորների վրա: Դա ահաբեկիչների ամենասարսափազդու հարձակումներից մեկն էր վերջին շաբաթների ընթացքում, իսկ աճող բռնության ֆոնին երկրում մտավախություն տարածվեց, թե խումբը կրկին ակտիվացել է:
Իրաքի ԶՈՒ գլխավոր հրամանատարի խոսնակ Յեհիյա Ռասուլն հայտնել է, որ ձեռնարկված ռազմական գործողությունների արդյունքում հայտնաբերվել է, որ հարձակումն իրականացրած ԻՊ-ի անդամները թաքնվել են Բաղդադից հյուսիս գտնվող Ալ-Ազիմում: Իրաքի ռազմաօդային ուժերը երեք ավիահարվածներ են հասցրել ահաբեկիչների ուղղությամբ, որի հետևանքով էլ սպանվել են ինը զինյալներ:
Իրաքի անվտանգության աշխատակիցներից մեկը, ով ցանկացավ մնալ անանուն, հայտնել է Associated Press-ին, որ սպանվածներից չորսը լիբանանցիներ են՝ Տրիպոլի քաղաքի բնիկներ:
Հիշեցնենք, որ «Իսլամական պետություն» ահաբեկչական կազմակերպությունը Իրաքում ջախջախվեց 2017 թվականին: Կազմակերպությանը վերջին հարվածը հասցվեց 2019 թվականին, երբ այն կորցրեց իր վերջին տարածքները Սիրիայի հարավ-արևելքում: Սակայն հազարավոր զինյալներ թաքնվել են անապատում և շարունակում են հարձակումներ իրականացնել՝ հաճախակի թիրախավորելով անվտանգության ուժերին, ինչպես նաև կրակ բացելով ռազմական շարասյունների կամ անցակետերի վրա:
Հետևեք մեզ տելեգրամում
