Կատարի արտգործնախարար շեյխ Մուհամմադ Բըն Աբդուլռահման Ալ-Թանին բացառել է Իսրայելի հետ հարաբերությունների կարգավորման հավանականությունը: Նա նման տեսակետ է հայտնել փետրվարի 2-ին ամերիկյան axios.com կայքին տված հարցազրույցի ժամանակ:
Կատարի բարձրաստիճան դիվանագետն ընդգծել է, որ Դոհան նախկինում հարաբերություններ պահպանել է Իսրայելի հետ, «երբ պաղեստինցիների հետ խաղաղության համար դեռ հեռանկարներ կային»:
Նա նշել է, որ ներկայումս Կատարը շարունակելու է իր «աշխատանքային հարաբերությունները» պահպանել պաղեստինցիներին աջակցելու նպատակով, սակայն իրատեսական չի համարել կարգավորել հարաբերությունները Իսրայելի հետ, ինչպես դա արեցին ԱՄԷ-ն կամ Բահրեյնը՝ «երկու պետություն սկզբունքի» կիրառման բացակայության պայմաններում:
Նշենք, որ Կատարը 2018 թվականից սկսած պարբերաբար միլիոնավոր դոլարների կանխիկ գումարներ է փոխանցել Գազայում ՀԱՄԱՍ-ի կառավարիչներին՝ Գազայի էլեկտրակայանի աշխատանքներն իրականացնելու, ենթակառուցվածքային նախագծերը ֆինանսավորելու և տասնյակ հազարավոր ընտանիքներին օգնություն տրամադրելու համար: Դոհան նաև վճարում էր Գազայի կառավարության մոտ 50,000 աշխատակիցների աշխատավարձերը՝ մինչև 2021 թվականի մայիսին Իսրայել-ՀԱՄԱՍ վերջին ռազմական բախումը:
Հետևեք մեզ տելեգրամում
