Մոսկվայում Ռուսաստանի արտգործնախարար Սերգեյ Լավրովը բանակցություններ է վարել Սիրիայի հարցերով ՄԱԿ-ի հատուկ ներկայացուցիչ Գեյր Պեդերսենի հետ՝ Ժնևում Սիրիայի սահմանադրական հանձնաժողովի խորհրդակցությունների վերսկսման շուրջ:
«Մենք մշտապես հաղորդակցվում ենք Սիրիայում բոլոր շահագրգիռ կողմերի հետ, ուստի այս համատեքստում ձգտում ենք առաջ գնալ և հաջողության հասնել, թեև շատ երկրներ խոչընդոտներ են ստեղծում՝ հատկապես Ռուստաստանի դեմ»,- ասել է Լավրովը:
Ռուս դիվանագետն ընդգծել է, որ ՄԱԿ-ի գլխավոր քարտուղարությունը պետք է անկողմնակալ լինի և տարբեր ճգնաժամերի համար լուծումներ գտնի՝ այդ թվում Սիրիայի:
Պեդերսենն իր հերթին հայտարարել է, որ ՄԱԿ-ի Գլխավոր քարտուղարը օրենքի գերակայությանն ու ՄԱԿ-ի կանոնադրությանն է աջակցում: Նա հույս է հայտնել, որ միջազգային վերջին զարգացումները Սիրիայում տիրող իրավիճակի վրա ազդեցություն չեն ունենա:
Նշենք, որ Սիրիայում խաղաղության հասնելու ՄԱԿ-ի ճանապարհային քարտեզը նախատեսում էր նոր սահմանադրության մշակում, որի նպատակով ստեղծվել էր Սիրիայի սահմանադրական հանձնաժողովը: Այս նախագիծը հաստատվել էր դեռևս 2012 թվականին ՄԱԿ-ի, Արաբական պետությունների լիգայի, Եվրամիության, Թուրքիայի և ՄԱԿ-ի Անվտանգության խորհրդի բոլոր հինգ մշտական անդամների կողմից: Հանձնաժողովում ընդգրկված են ինչպես Սիրիայի կառավարող վարչակարգի, այնպես էլ ընդդիմության ներկայացուցիչներ: Նախատեսվում էր, որ հանձնաժողովի աշխատանքն ավարտվելու է ՄԱԿ-ի կողմից վերահսկվող ընտրություններով, որոնց մասնակցելու իրավունք կունենան բոլոր սիրիացիները, այդ թվում՝ արտագաղթածները։
Հետևեք մեզ տելեգրամում
