Լիբանանի նախագահ Միշել Աունն ընդունել է Բեյրութում ՀՀ դեսպան Վահագն Աթաբեկյանին: Տեղեկությունը հայտնում է Լիբանանի պետական NNA լրատվական գործակալությունը:
Դեսպան Աթաբեկյանը Միշել Աունին է փոխանցել ՀՀ նորընտիր նախագահ Վահագն Խաչատուրյանի գրավոր ուղերձը:
«Լիբանանի և Հայաստանի միջև դիվանագիտական հարաբերությունների հաստատման 30-ամյակի կապակցությամբ ուրախությամբ ցանկանում եմ նշել մեր երկու երկրների միջև մշտապես զարգացող գործընկերային հարաբերությունների փոխշահավետությունը։ Ես նաև արտահայտում եմ Հայաստանի ցանկությունը՝ ամրապնդել և խորացնել համագործակցությունը Լիբանանի հետ՝ ի շահ երկու ժողովուրդների», – նշված է ՀՀ նախագահի ուղերձում:
Գործակալության հաղորդմամբ՝ Լիբանանի նախագահ Աունն ու ՀՀ դեսպան Աթաբեկյանն անդրադարձել են հայ-լիբանանյան հարաբերություններին և դրանց զարգացման ուղիներին, ինչպես նաև տարածաշրջանային ու միջազգային վերջին զարգացումներին։
Հետևեք մեզ տելեգրամում
