Այսօր Երուսաղեմի Ալ-Աքսա մզկիթում բախումներ են տեղի ունեցել պաղեստինցիների և Իսրայելի ոստիկանության ուժերի միջև:
Հաղորդվում է, որ բախումների հետևանքով վիրավորվել է 152 պաղեստինցի։
Al Arabiya-ն գրել է, որ Իսրայելի ոստիկանությունն այսօր՝ լուսաբացից առաջ, մտել է Ալ-Աքսա մզկիթ, որտեղ հազարավոր մուսուլման հավատացյալներ հավաքվել էին Ռամադան ամսվա վաղ առավոտյան աղոթքի համար:
Համացանցում շրջանառվում են տեսանյութեր, որոնք ցույց են տալիս, թե ինչպես են պաղեստինցիները քարեր նետում, իսկ ոստիկանությունը կիրառում է արցունքաբեր գազ և նռնակներ արձակում:
Իր հերթին Իսրայելի արտաքին գործերի նախարարությունը տեղեկացրել է, որ դիմակավորված տասնյակ անձինք՝ իրենց մոտ ունենալով Պաղեստինի և ՀԱՄԱՍ-ի դրոշները, ուրբաթ վաղ առավոտյան երթով շարժվել են դեպի մզկիթ:
«Ոստիկանությունը ստիպված է եղել մտնել տարածք՝ ցրելու ամբոխը և հետագա բռնությունները կանխելու համար հեռացնելու քարերը», – Twitter-ում հաղորդագրություն է տարածել Իսրայելի ԱԳՆ-ը։
Ուշագրավ է, որ լարվածությունը տեղի է ունենում զգայուն ժամանակաշրջանում: Այս տարի Ռամադանը համընկնում է իսրայելական և քրիստոնեական կարևոր տոների հետ (հրեական Զատիկը՝ Փեսախը, որը սկսվում է ուրբաթ օրը մայրամուտից հետո, և քրիստոնեական սուրբ շաբաթը, որն ավարտվում է կիրակի օրը՝ Զատիկի տոնով):
Նշենք, որ անցյալ տարի իսրայելական ոստիկանության և պաղեստինցիների միջև բախումներ են տեղի ունեցել Երուսաղեմի Ալ-Աքսա մզկիթի շուրջ Ռամադան պահքի ամսին: Բռնությունները Գազայի զինյալների և Իսրայելի միջև հանգեցրին 11-օրյա պատերազմի բռնկմանը:
Հետևեք մեզ տելեգրամում
