Երեկ կայացել է Իսրայելի նախագահ Իցխակ Հերցոգի և Թուրքիայի նախագահ Ռեջեփ Էրդողանի հեռախոսազրույցը:
Հեռախոսազրույցը կայացել է Էրդողանի նախաձեռնությամբ, ով իր անհանգստությունն է արտահայտել Երուսաղեմի Տաճարի լեռան շուրջ ծավալվող լարվածության համատեքստում:
Հեռախոսազրույցի ընթացքում Թուրքիայի նախագահը շեշտել է սրբազան վայրերում կրոնական ստատուս քվոյի պահպանման կարևորությունը:
Հերցոգն իր հերթին ընդգծել է բոլոր կրոնների ազատությունը պաշտպանելու Իսրայելի ջանքերը՝ ավելացնելով, որ դատապարտելի են բոլոր տեսակի բռնությունները:
Հաղորդվում է նաև, որ երկկողմ բանակցություններն ընթացել են դրական միջավայրում: Նախագահները երկուստեք պայմանավորվել են շարունակել հաղորդակցությունը «նույնիսկ խարխլված հարաբերությունների ժամանակ»:
Հիշեցնենք, որ վերջին շրջանում Երուսաղեմում իսրայելա-պաղեստինյան զգալի լարվածություն է նկատվում: Ավելի վաղ տեղեկացրել էինք, որ Ալ-Աքսա մզկիթում իսրայելական ոստիկանության ուժերի և մուսուլման հավատացյալների միջև բախումներ են եղել: Լարվածությունը շարունակվել է նաև Տաճարի լեռան մոտակայքում: Իսկ երեկ վերջին 7 ամսվա ընթացքում առաջին անգամ Իսրայելն ավիահարվածներ էր հասցրել Գազայում տեղակայված ՀԱՄԱՍ-ի դիրքերին:
Հետևեք մեզ տելեգրամում
