Իրաքն իրավունք ունի օգտագործել «ուժի բոլոր աղբյուրները»՝ ի պատասխան Թուրքիայի ռազմական գործողության։ Այս մասին այսօր հայտարարել է Իրաքի արտգործնախարարության խոսնակ Ահմադ Ալ-Սահաֆը:
Ալ-Սահաֆը շեշտել է, որ Իրաքի տարածքում Թուրքիայի ռազմական գործողությունները Իրաքի ինքնիշխանության բացահայտ խախտում են և սպառնում տարածքային ամբողջականությանը: Ըստ նրա՝ որ այդ «գործողություններին հետևում է ահաբեկչություններ և վտանգվում է Իրաքի քաղաքացիների անվտանգությունը»։
Նա հիշեցրել է, որ Բաղդադում Թուրքիայի դեսպանը կանչվել է արտգործնախարարություն և նրան է հանձնվել բողոքի նոտա: Խոսնակը նշել է, որ պատասխան նամակ դեռևս չի ստացել՝ հավելելով, որ Իրաքն իրավունք ունի կիրառել ուժային բոլոր հնարավորությունները, որոնք համապատասխանում են ՄԱԿ-ի ու միջազգային իրավունքների սկզբունքներին:
Ալ-Սահաֆը հերքել է Թուրքիայի այն պնդումները, թե գործողությունները համակարգվում են Բաղդադի հետ:
Հիշեցնենք, որ նախօրեին՝ երկուշաբթի, թուրքական բանակը ռազմական գործողություն էր սկսել Իրաքի տարածքում՝ «Քուրդիստանի բանվորական կուսակցության» (PKK) անդամներին հետապնդելու նպատակով։
Երեկ Իրաքի արտաքին գործերի նախարարությունը Բաղդադում Թուրքիայի դեսպանին փոխանցել է «բողոքի նոտա»՝ Հյուսիսային Իրաքի շրջաններում թուրքական բանակի կողմից իրականացված ռազմական գործողության պատճառով։
Հետևեք մեզ տելեգրամում
