Սաուդյան Արաբիայի թագավորության Ջիդդա քաղաքի Ալ-Սալամ պալատում թագաժառանգ Մուհամմադ բըն Սալմանն ընդունել է Թուրքիայի նախագահ Ռեջեփ Թայիփ Էրդողանի հետ:
Կողմերը քննարկել են սաուդա-թուրքական հարաբերությունները և տարբեր ոլորտներում դրանք ամրապնդելու հնարավորությունները, ինչպես նաև տարածաշրջանային և միջազգային զարգացումները:
Նշենք, որ այսօր Թուրքիայի նախագահը ժամանել էր Սաուդյան Արաբիա երկօրյա այցով: Նրա գլխավորած պատվիրակության կազմում էին արդարադատության, պաշտպանության, ֆինանսների և ներքին գործերի նախարարները:
Էրդողանը թվիթթերյան իր գրառումներից մեկում հաստատել է, որ Սաուդյան Արաբիա է մեկնում թագավոր Սալմանի հրավերով՝ ավելացնելով, որ այս այցը «բարեկամ և եղբայրական թագավորության հետ նոր դարաշրջանի դուռ կբացի»:
Հիշեցնենք, որ Սաուդյան Արաբիայի և Թուրքիայի միջև հարաբերություններն ընդհատվել էին Washington Post-ի սաուդցի լրագրող Ջամալ Խաշոկջիի սպանության միջադեպով, որը կատարվել էր Ստամբուլում Սաուդյան Արաբիայի հյուպատոսարանում:
Էրդողանը հայտարարել էր, որ սպանությունը «կանխամտածված» էր, և որ Խաշոկջիի սպանության հրամանը ստացվել է Սաուդյան Արաբիայի կառավարության «բարձրագույն մակարդակներից»:
Հարկ է նշել, որ վերջին շրջանում որոշակի ջերմացում է նկատվում երկկողմ հարաբերություններում առկա լարվածության հաղթահարման համար:
Ավելի վաղ հայտնել էինք, որ Թուրքիայի դատարանը որոշում էր կայացրել կասեցնել Խաշոկջիի սպանության մեջ մեղադրվող 26 սաուդցիների դատավարությունը և գործը փոխանցել Սաուդյան Արաբիային։
Հետևեք մեզ տելեգրամում
