Երեկ Իսրայելի պաշտպանության նախարար Բեննի Գանցը Վաշինգտոնում հանդիպել է Պենտագոնի ղեկավար Լլոյդ Օսթինի հետ:
Հանդիպմանը քննարկվել է Իրանի միջուկային տերություն դառնալու սպառնալիքը և նրա տարածաշրջանային ազդեցությունը:
«Պետք է գործողություններ ձեռնարկվեն ընդդեմ Իրանի ագրեսիայի տարբեր եղանակներով՝ այդ թվում տարածաշրջանում ԱՄՆ-ի գլխավորությամբ կոալիցիա ստեղծելով»,- հայտարարել է Գանցը:
Հանդիպման ընթացքում Իսրայելի ՊՆ ղեկավարը Օսթինին հայտնել է, որ հնարավորություն կա «տարածաշրջանում էական փոփոխություն» իրականացնել՝ ուժեղացնելով ԱՄՆ-ի ղեկավարությամբ գործող երկրների տարածաշրջանային կոալիցիան և Իրանի դեմ Մերձավոր Արևելքի այլ երկրների հետ համագործակցելով:
Կողմերն անդրադարձել են նաև Ուկրաինայում տիրող իրավիճակին:
Այս համատեքստում Գանցը հիշեցրել է, որ ավելի վաղ Իսրայելը մարդասիրական աջակցություն էր ուղարկել Ուկրաինային: Իսկ օրեր առաջ ոչ հարձակվողական սարքավորումներ են ուղարկվել Ուկրաինա:
Իր հերթին Լլոյդ Օսթինը վերահաստատել է «Միացյալ Նահանգների հանձնառությունն Իսրայելի անվտանգությանը և ռազմական որակական առավելությունը պահպանելուն»:
Ավելի վաղ տեղեկացրել էինք, որ Իսրայելի պաշտպանության նախարար Բեննի Գանցը մեկնել էր ԱՄՆ: Նա հանդիպել էր նաև ԱՄՆ նախագահի խորհրդական Ջեյք Սալիվանի հետ:
Հետևեք մեզ տելեգրամում
