Թուրքիան Սիրիայի հյուսիսում ռազմական գործողություն է սկսելու «անվտանգության գոտու» ստեղծման համար, որի խորությունը հասնելու է 30 կիլոմետրի: Մի քանի օր առաջ այս մասին հայտարարել է Թուրքիայի նախագահ Ռեջեփ Թայիփ Էրդողանը:
Թուրքական դիվանագիտական և ռազմական աղբյուրները հայտնել են կատարական Al-Araby Al-Jadeed-ին, որ Սիրիայի հյուսիսում Թուրքիայի ռազմական գործողությունը ոչ թե դադարեցվել է, այլ հետաձգվել անհրաժեշտ նախապատրաստություններն ավարտին հասցնելու համար:
Բացի այդ, ընդդիմադիր «Սիրիայի ազգային բանակ»-ին մոտ կանգնած աղբյուրը, որը նախընտրել է անանուն մնալ, հայտնել է կատարական Al-Araby Al-Jadeed-ին, որ շաբաթ թուրքական կողմը սիրիա-թուրքական սահմանի Հիվար Քիլիս շրջանում տեղի ունեցած հանդիպման ժամանակ տեղեկացրել է ընդդիմադիր խմբավորումների առաջնորդներին, որ ռազմական գործողության ժամկետը անորոշ ժամանակով հետաձգվում է:
Թուրքական դիվանագիտական աղբյուրը Al-Araby Al-Jadeed-ին հայտնել է, որ «նախապատրաստական աշխատանքները շարունակվում են ողջ թափով՝ այդ թվում քաղաքական և դիվանագիտական առումով»:
Ըստ աղբյուրի՝ թուրքական դիվանագիտությունը փորձում է օգուտ քաղել ներկայիս զարգացումներից, ինչպիսիք են ռուս-ուկրաինական պատերազմը և ՆԱՏՕ-ին անդամակցության վերջին զարգացումները։ Հետևաբար, թուրքական կողմը շարունակում է շահագրգիռ կողմերի՝ առաջին հերթին ԱՄՆ-ի և Ռուսաստանի հետ շփումները՝ ռազմական գործողությունները քաղաքական շղարշով պատելու համար:
Աղբյուրը հավելել է, որ «ամերիկյան կողմի հետ շփումը դեռ շարունակվում է հատկապես այն ժամանակ, երբ Անկարան տեսնում է, որ Մոսկվայի կողմից ըմբռնում կա ռազմական գործողության շուրջ Անկարայի դիրքորոշումների վերաբերյալ»:
Իր հերթին թուրքական ռազմական աղբյուրը տեղեկացրել է լրատվամիջոցին, որ «նոր ռազմական գործողությունը չի իրականացվի այնքան ժամանակ, քանի դեռ չեն ավարտվել դաշտային նախապատրաստական աշխատանքները: Քանի դեռ այդ աշխատանքները չեն ավարտվել, Էրդողանը ռազմական գործողությունը սկսելու հրաման չի տա: Ներկայումս նախապատրաստական աշխատանքները դեռ շարունակվում են ցածր տեմպերով և առաջիկա օրերին կարող են արագանալ, իսկ երբ դրանք ավարտվեն, ցանկացած պահի կարող է հայտարարություն արվել»:
Հետևեք մեզ տելեգրամում
