Հայկական ազգային ավիափոխադրողը՝ Fly Arna-ն ազդարարեց իր գործունեության մեկնարկը. Շարժայի միջազգային օդանավակայանից Fly Arna-ի առաջին Airbus A320 օդանավը վայրէջք կատարեց «Զվարթնոց» միջազգային օդանավակայանում:
Օդանավը ժամանեց հունիսի 10-ին՝ իր հետ բերելով «Էյր Արաբիա» խմբի պատվիրակությանը։
Պաշտոնական մեկնարկին նվիրված արարողությանը ներկա էին նաև ՀՀ վարչապետ Նիկոլ Փաշինյանը, Հայաստանի կառավարության, Հայաստանի պետական հետաքրքրությունների ֆոնդի, «Էյր Արաբիա» խմբի, Քաղաքացիական ավիացիայի կոմիտեի, Զվարթնոց միջազգային օդանավակայանի բարձրաստիճան ներկայացուցիչներ:
Սկզբնական շրջանում Fly Arna-ն թռիչքներ կիրականացնի 4 ուղղությամբ:
«Երկու ուղղություն՝ դեպի Եգիպտոս՝ Հուրգադա և Շարմ էլ Շեյխ, նաև Քուվեյթ ու Բեյրութ: Չենք պլանավորում նույնիսկ մոտ ապագայում սահմանափակվել 4 ուղղությամբ, գալիք 3-4 շաբաթվա ընթացքում հայտարարություններ կլինեն նոր ուղղությունների մասով»,-ասաց Հայաստանի պետական հետաքրքրությունների ֆոնդի գործադիր տնօրեն Դավիթ Փափազյանը` լրագրողների հետ զրույցում:
Առաջին չվերթը կիրականացվի «Զվարթնոց» միջազգային օդանավակայանից դեպի Հուրգադայի միջազգային օդանավակայան հուլիսի 3-ին:
Fly Arna-ի գլխավոր գործադիր տնօրեն Էնթոնի Փրայսն էլ լրագրողների հետ զրույցում ընդգծեց. «Մեծ ակնկալիքով ու սիրով սպասում ենք՝ տեսնելու, թե ինչպես է այս ավիաընկերությունն ավելի ընդլայնելու եկող շաբաթների և ամիսների ընթացքում: Սպասում են մի շարք ուղղությունների, որոնցով հայերը կկարողանան գնալ հանգստի, ինչպես նաև այլ անձանց բերել Հայաստան՝ այստեղ բացահայտելու երկիրը»:
Հետևեք մեզ տելեգրամում
