Region Monitor-ը ներկայացնում է շաբաթվա ընթացքում Իրանում, Թուրքիայում Հվ. Կովկասում, արաբական մի շարք երկրներում տեղի ունեցած կարևոր զարգացումները և իրադարձությունները:
Երևան էր ժամանել Ռուսաստանի արտգործնախարար Սերգեյ Լավրովը: Նա հանդիպել էր իր հայ պաշտոնակից Արարատ Միրզոյանի հետ: Լավրովին ընդունել էր նաև ՀՀ նախագահ Վահագն Խաչատուրյանը:
Երևան էր ժամանել նաև Հարավային Կովկասում Եվրամիության հատուկ ներկայացուցիչ Տոյվո Կլաարը: Նա «Ազատության» հետ զրույցում հայտարարել էր, որ առանց «Ղարաբաղի հայերի կարծիքը հաշվի առնելու հնարավոր չէ հասնել կարգավորման»:
Արցախի Հանրապետության պետնախարար Արտակ Բեգլարյանը հարցազրույց էր տվել ռուսական «ՌԻԱ Նովոստի»-ին և նշել, որ իր կարծիքով, Ռուսաստանում արդեն գիտակցում են Ադրբեջանի հակառուսական էությունը և անհուսալի «գործընկեր» լինելը:
Նշենք, որ Ադրբեջանում արգելափակվել է «ՌԻԱ Նովոստի»-ի կայքը։ Պատճառը Արցախի պետնախարար Արտակ Բեգլարյանի խոսքերի հրապարակումն է եղել։
Շաբաթվա սկզբին հեռախոսազրույց են ունեցել Ռուսաստանի և Իրանի արտգործնախարարները: Ամիր Աբդոլլահիան ու Սերգեյ Լավրովը քննարկել են տարածաշրջանային և միջազգային հարցերի, այդ թվում՝ Ուկրաինայում տիրող իրավիճակի շուրջ:
Իսկ Իրանի արտգործնախարարի այցը Թուրքիա անորոշ ժամկետով հետաձգվել է:
Իրանի ատոմային էներգիայի կազմակերպությունը հայտարարել էր, որ իր միջուկային օբյեկտներից մեկում անջատել է ՄԱԳԱՏԷ-ի հետ Լրացուցիչ արձանագրության շրջանակներում տեղակայված 2 տեսախցիկները:
Իսկ ՄԱԳԱՏԷ-ի կառավարիչների խորհրդում ընդունվել է ԱՄՆ-ի, Ֆրանսիայի, Մեծ Բրիտանիայի և Գերմանիայի ներկայացրած բանաձևը, որով Իրանին կոչ է արվում բացատրություն տալ միջուկային երեք վայրերում հայտնաբերված ուրանի մասնիկների վերաբերյալ։ Այս համատեքստում Իրանի նախագահ Էբրահիմ Ռայիսին հայտարարել է, որ «Իրանն իր դիրքերից մեկ քայլ անգամ հետ չի գնա»:
Իսրայելի և Լիբանանի միջև ծովային սահմանազատման շուրջ հակասությունները դարձյալ սրվել են: Միջերկրական ծովի Քարիշ օֆշորում բնական գազի հանքավայրում հետազոտական աշխատանքներ իրականացնելու համար գազ հորատող նավ էր ժամանել: Պաշտոնական Բեյրութում նման գործողությունները որակվել են որպես «սադրանք և թշնամական գործողություն»:
Իսրայելը շարունակում է հրթիռակոծել Սիրիայի մայրաքաղաք Դամասկոսը: Միայն այս շաբաթվա ընթացքում Իսրայելի զինված ուժերը երկու անգամ ավիահարվածներ են հասցրել Դամասկոսին: Այսօր էլ հաղորդվել է, որ Դամասկոսի միջազգային օդանավակայանը դադարեցրել է բոլոր թռիչքները, քանի որ «տեխնիկական խափանումներ են եղել»:
Իսկ Սիրիայի և Ռուսաստանի ռազմաօդային ուժերը համատեղ զորավարժություններ են իրականացրել Գոլանի բարձունքների երկայնքով, ինչպես նաև Սիրիայի հյուսիսային, արևելյան և հարավային շրջաններում:
Իսկ Իրաքյան Քուրդիստանի մայրաքաղաք Էրբիլում անօդաչու թռչող սարք է պայթել, որի հետևանքով վիրավորվել է 3 մարդ:
Լիբանանի նախագահ Միշել Աունն ընդունել է Լիբանանի ՀՅԴ Կենտրոնական կոմիտեի և պատգամավորական բլոկի ներկայացուցիչ Հակոբ Բագրատունուն: Իսկ ավելի վաղ Լիբանանի խորհրդարանի նախագահ Նաբիհ Բերրին ընդունել էր Բեյրութում ՀՀ դեսպան Վահագն Աթաբեկյանին:
Անկարայում հանդիպել են Ռուսաստանի և Թուրքիայի արտգործնախարարները: Լավորվը հայտնել է, որ «3+3» ձևաչափով (Ադրբեջան, Հայաստան, Վրաստան-Ռուսաստան, Թուրքիա, Իրան) համագործակցության հարթակի հերթական՝ թվով երկրորդ հանդիպումը Հարավային Կովկասի հարցով նախապատրաստվում է և տեղի կունենա մոտ ապագայում։
Երեկ Թուրքիայի արտգործնախարար Մևլութ Չավուշօղլուն ընդունել էր Պոլսի հայոց պատրիարք Սահակ արքեպիսկոպոս Մաշալյանին և «Վատիկանում Հայ առաքելական եկեղեցու ներկայացուցիչ» Խաժակ արքեպիսկոպոս Պարսամյանին:
Հետևեք մեզ տելեգրամում
