ՆԱՏՕ-ն Վրաստանում կավելացնի զորավարժությունների հաճախականությունը: Այս մասին տեղեկացնում է Վրաստանում ՆԱՏՕ-ի կապի գրասենյակի ղեկավար Ալեքսանդր Վինիկովը:
Վինիկովը նշել է, որ Մադրիդում դաշնակիցները ՆԱՏՕ-ի գագաթնաժողովում աջակցել են Վրաստանին անհատականորեն հարմարեցված աջակցության միջոցառումների փաթեթին, որն արտահայտում է ՆԱՏՕ-ի ընդգծված քաղաքական աջակցությունը Վրաստանին։
«Միջոցառումները ներառում են և՛ քաղաքական, և՛ գործնական աջակցություն Վրաստանին՝ անհատական հարմարեցված փաթեթով: Այս նոր փաթեթը կոչված է օգնելու Վրաստանին` բարելավել իր կարողությունները, նաև ուժեղացնել իր ճկունությունը, այդ թվում՝ ավելացնելով Վրաստանի մասնակցությունը ՆԱՏՕ-ի կիբեր վարժանքներին, ամրացնելով անվտանգ հաղորդակցությունները և կարևոր ենթակառուցվածքների պաշտպանությունը»,- ավելացրել է նա:
Վինիկովը հավելել է, որ կշարունակեն աշխատել ՆԱՏՕ-Վրաստան հիմնական փաթեթի վրա, որը մնում է ՆԱՏՕ-ի գործնական օգնության հիմնական շրջանակը, ներառյալ այնպիսի ոլորտներում, ինչպիսիք են օդային պաշտպանությունը, հետախուզությունը, ճգնաժամային կառավարումը և կիբեր պաշտպանությունը:
Հետևեք մեզ տելեգրամում
