Կատարի արտգործնախարար Մուհամմադ բն Աբդուլռահման Ալ-Թանին այսօր ժամանել է Թեհրան, որտեղ հանդիպել է իրանցի իր պաշտոնակից Հոսեյն Ամիր Աբդոլլահիանի հետ:
Նա նաև հանդիպելու է Իրանի ազգային անվտանգության գերագույն խորհրդի քարտուղար Ալի Շամխանիի հետ:
Հանդիպման ավարտին Աբդոլլահիանն ու Ալ-Թանին համատեղ մամուլի ասուլիս են տվել, որի ընթացքում իրանցի դիվանագետը փորձել է հակադարձել Միացյալ Նահանգների այն հայտարարությանը, թե Իրանն է մեղավոր միջուկային բանակցությունների ձախողման մեջ։
«Չնայած ամերիկյան կողմի որոշ լրատվամիջոցների պնդումներին, մենք չունենք պահանջներ, որոնք դուրս են Գործողությունների համատեղ համապարփակ ծրագրից»,- հայտարարել է Աբդոլլահիանը:
Իրանի արտգործնախարարը հավելել է, որ Իրանը պատրաստ է ամուր և կայուն համաձայնագրի։
Իր հերթին Ալ-Թանին վերահաստատել է Կատարի աջակցությունը միջուկային համաձայնագրի վերականգնմանը, ինչպես նաև Իրանի և տարածաշրջանի երկրների միջև տարածաշրջանային բանակցություններին։
Նշենք, որ Կատարի արտգործնախարարի այցը Թեհրան տեղի է ունեցել այն բանից հետո, երբ Դոհայում հունիսի վերջին տեղի ունեցան Իրանի և Միացյալ Նահանգների միջև երկօրյա անուղղակի բանակցություններ:
Բանակցություններն ավարտվել են առանց որևէ առաջընթացի, քանի որ Թեհրանի և Վաշինգտոնի միջև առկա են էական տարաձայնություններ ԱՄՆ-ի կողմից սահմանված պատժամիջոցների չեղարկման շրջանակի և երաշխիքների շուրջ:
Հետևեք մեզ տելեգրամում
