Հայաստանում նախատեսվում է ներդնել նոր ծրագիր, որի շրջանակում բազմազավակ ընտանիքները պետական աջակցությամբ հնարավորություն կունենան ձեռք բերել բնակարան կամ կառուցել սեփական տուն։
Ծրագրի նախագիծը ներկայացրել է ՀՀ աշխատանքի և սոցիալական հարցերի նախարարությունը՝ այն հրապարակելով իրավական ակտերի նախագծերի միասնական հարթակում։ Նախաձեռնության հիմնական նպատակը բազմազավակ ընտանիքների համար բնակարանային պայմանների բարելավումն ու բնակարանի հասանելիության բարձրացումն է։ Նշվում է, որ ներկայում գործում է միայն միանվագ աջակցության ձևաչափով ծրագիր, որտեղ վարկային պարտավորությունները կրում են շահառուները։
Առաջարկվող նոր ծրագրով նախատեսվում է 100 տոկոս սուբսիդավորում, ինչը ընտանիքներին հնարավորություն կտա առանց հավելյալ ֆինանսական բեռի ձեռք բերել բնակարան կամ իրականացնել տան կառուցում։
Նախագծի համաձայն՝ յուրաքանչյուր անչափահաս երեխայի համար կտրամադրվի 4 մլն դրամ աջակցություն։ Գյուղական բնակավայրում բնակվելու դեպքում ընտանիքները կստանան ևս լրացուցիչ 4 մլն դրամ, որը կարող է ուղղվել հողատարածքի ձեռքբերմանը կամ շինարարությանը։
Ըստ նախնական տվյալների՝ Հայաստանում հաշվառված է 643 բազմազավակ ընտանիք՝ 6 և ավելի անչափահաս երեխայով։ Նրանցից 390 ընտանիք ունի 6 երեխա, 143-ը՝ 7, իսկ մնացածները՝ ավելի մեծ թվով երեխաներ։
Ծրագրով սահմանվում է նաև նվազագույն բնակմակերեսի չափանիշ՝ յուրաքանչյուր անձի համար առնվազն 10 քմ։ Օրինակ, 6 երեխա ունեցող ընտանիքի համար պահանջվող նվազագույն բնակտարածքը կազմում է շուրջ 80 քմ, որի ձեռքբերման համար կարող է տրամադրվել մոտ 24 մլն դրամ պետական աջակցություն։
Նախնական հաշվարկներով՝ ծրագրի իրականացման համար առաջիկա 10 տարիների ընթացքում պետական բյուջեից կպահանջվի առավելագույնը 31,9 մլրդ դրամ՝ պայմանով, որ բոլոր շահառու ընտանիքները ներգրավվեն ծրագրում։
Հետևեք մեզ տելեգրամում
