Իրանի արտգործնախարար Հոսեյն Աբդոլլահիանի դիտարկմամբ՝ Դոհայի բանակցությունները չեն տապալվել, քանի որ միջուկային համաձայնագրի սևագրի կազմման ու նոր առաջարկների շուրջ քննարակումներում առաջընթաց կա: Այս մասին նա ասել է իտալական La Repubblica թերթին տված հարցազրույցում:
«Առաջընթաց կա, բայց այլ հարցեր էլ կան, որոնց պետք է անդրադառնալ: Մենք տնտեսական ուժեղ երաշխիքներ ենք ցանկանում: Եթե արևմտյան ընկերությունը իրանական ընկերության հետ պայմանագիր կնքի, պետք է վստահ լինի, որ նախագիծը կիրականացվի, և պատժամիջոցների դեպքում էլ փոխհատուցում կստանա»,- մանրամասնել է Իրանի ԱԳ նախարարը:
Աբոդոլլահիանի խոսքով՝ Թեհրանը ողջունում է բանակցությունների համար Իտալիայի առաջարկած գաղափարները:
Նա նաև անդրադարձել է ԻՀՊԿ-ին պատժամիջոցների ցանկից հեռացնելու հարցին՝ հավելելով, որ իրանական կողմն առաջարկել է ԱՄՆ-ին հետաձգել այս հարցի շուրջ քննարկումները:
«Բայց պետք է վստահ լինենք, որ իրանական ընկերությունները համաձայնագրից իրենց օգուտը կստանան: Տնտեսական շահույթն անհրաժեշտություն է, մենք համաձայնագրից դուրս բաներ չենք պահանջում»,- պնդել է արտգործնախարարը:
Աբդոլլահիանն ընդգծել է, որ եթե բանակցություններն արդյունքի հասնեն, Իրանը նորից կմիացնի ՄԱԳԱՏԷ-ի Լրացուցիչ արձանագրության շրջանակներում տեղադրված տեսախցիկները:
Հետևեք մեզ տելեգրամում
