Իրանում Հայաստանի դեսպան Արտաշես Թումանյանը Քերմանի նահանգապետի հետ հանդիպման ժամանակ հայտարարել է, որ չնայած ամերիկյան պատժամիջոցներին՝ Երևան մտադիր է զարգացնել համագործակցությունը Թեհրանի հետ։
Իրանական պետական «IRNA» գործակալության փոխանցմամբ՝ փետրվարի 5-ին կայացած հանդիպման ժամանակ Թումանյանը մասնավորապես ասել է․ «Այն պայմաններում, երբ ներդրողները հրաժարվում են համագործակցել Իրանի հետ ԱՄՆ-ի պատժամիջոցների պատճառով, Հայաստանի Հանրապետությունն ու Իրանը կարող են զարգացնել փոխգործակցությունը բազմաթիվ ուղղություններով»։
Նրա խոսքով՝ Իրանի եւ Հայաստանի հարաբերությունները միշտ եղել են բարեկամական, եւ հայկական կողմը ցանկանում է, որ դրանք էլ ավելի ամրապնդվեն եւ զարգանան:
Դեսպանը նաև ընդգծել է, որ Եվրասիական տնտեսական միության հետ Իրանի ազատ առևտրի գոտու մասին ժամանակավոր համաձայնագիրը լավ հնարավորություն է Թեհրանի եւ Երեւանի միջև համագործակցության ընդլայնման համար:
Հետևեք մեզ տելեգրամում
