Պաշտոնական Ստեփանակերտը շահագրգռված է, որպեսզի միջազգային հանրությունը միշտ արձագանքի տարածաշրջանում իրավիճակի ցանկացած ապակայունացմանը։ Այս մասին ասել է Արցախի արտաքին գործերի նախարար Դավիթ Բաբայանը՝ NEWS.am-ի թղթակցի հետ զրույցում մեկնաբանելով Արցախի Հանրապետության դեմ Ադրբեջանի վերջին ագրեսիայի արձագանքը։
«Արցախի ԱԳՆ-ի հայտարարությունում դա նշված է։ Ընդ որում, մենք ցանկանում ենք հենց հասցեական արձագանք, անգամ հայտարարությունների մակարդակով։ Բայց, ցավոք, մենք ընդհանուր առմամբ չենք տեսնում միջազգային հանրության արձագանքի հասցեականություն։ Ավելին, որոշ կազմակերպություններ, հայտարարելով թեժացման անթույլատրելիության եւ իրավիճակի կայունացման իրենց շահագրգռվածության մասին, չգիտես ինչու փաստորեն հավասարության նշան են դնում ագրեսորի եւ ագրեսիայի ենթարկված կողմի միջեւ։ Սա անթույլատրելի է։ Ավելի լավ է, ուրեմն, որ հայտարարություններ չլինեն, քան լինեն հայտարարություններ, որոնք հավասարեցնում են ագրեսիայի զոհին եւ ագրեսիան սկսած կողմին։ Այս դեպքում դա յուրատեսակ, հատկապես միջնաժամկետ եւ երկարաժամկետ հեռանկարում, նոր ագրեսիայի լրացուցիչ խթան է։ Մենք ենք ենթարկվել ագրեսիայի Ադրբեջանի կողմից, եւ ոչ թե Ադրբեջանը՝ մեր կողմից։ Դրա համար հավասարության նշան դնելը ճիշտ չէ թե՛ քաղաքական, թե՛, առավել եւս, բարոյական տեսակետից»,- ընդգծել է Դավիթ Բաբայանը։
Հետևեք մեզ տելեգրամում
