ՀՀ վարչապետ Նիկոլ Փաշինյանը հեռախոսազրույց է ունեցել Իրանի Իսլամական Հանրապետության նախագահ Սեյեդ Էբրահիմ Ռայիսիի հետ։
Ինչպես տեղեկացնում է ՀՀ կառավարությունը, զրուցակիցները քննարկել են տարածաշրջանային զարգացումներին և անվտանգային մարտահրավերներին վերաբերող հարցեր։
ՀՀ վարչապետն Իրանի նախագահին մանրամասներ է ներկայացրել Հայաստանի և Ադրբեջանի միջև սահմանային վերջին միջադեպերի վերաբերյալ։ Տարածաշրջանում կայունության և խաղաղության հաստատման համատեքստում Նիկոլ Փաշինյանն ընդգծել է 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի եռակողմ պայմանավորվածությունների լիարժեք իրականացման կարևորությունը:
Իրանի նախագահը, անդրադառնալով վերջին օրերին Հարավային Կովկասում տեղի ունեցող լարված միջադեպերին, հիշատակել է Իսլամական հեղափոխության գերագույն առաջնորդ Այաթոլլա Խամենեիի՝ վերջերս Ռուսաստանի և Թուրքիայի նախագահների հետ հանդիպման ժամանակ արված հայտարարությունը առ այն, որ Իրանը զգայուն է Կովկասյան տարածաշրջանում իր սահմանների հարցում և կհակազդի դրանք փոփոխելու ցանկացած փորձի:
Կողմերը մտքեր են փոխանակել նաև երկկողմ կապերի շուրջ, ընդգծել դրանց սերտացման կարևորությունը:
Նշենք, որ հեռախոսազրույցի վերաբերյալ նույնաբովանդակ հայտարարություն է տարածել նաև իրանական կողմը:
Մասնավորապես Իրանի նախագահի գրասենյակը հայտարարության համաձայն՝ Իրանի նախագահ Ռայիսին երկու երկրների հարաբերությունները պատմական և խորն է բնութագրել և ընդգծել տնտեսական համագործակցության զարգացման անհրաժեշտությունը:
Ռայիսին, մատնանշելով Թուրքիայի ու ՌԴ նախագահների հետ հանդիպմանը սահմանների փոփոխության մասին հոգևոր առաջնորդի հայտարարությունները, հավելել է.
«Իրանը տարածաշրջանի աշխարհաքաղաքականությունում որևէ փոփոխություն չի ընդունի, և պատրաստ իր բոլոր հնարավորությունները ծառայեցնել Կովկասում խաղաղության և կայունության հաստատման, այդ տարածաշրջանի զարգացման համար»:
Հետևեք մեզ տելեգրամում
