Region Monitor-ը ներկայացնում է շաբաթվա ընթացքում Իրանում, Թուրքիայում, Հվ. Կովկասում, արաբական մի շարք երկրներում տեղի ունեցած կարևոր զարգացումները և իրադարձությունները:
Արցախում իրադրությունը շփման գծում եղել է հարաբերականորեն կայուն և հրադադարի պահպանման ռեժիմի էական խախտումներ և միջադեպեր չեն արձանագրվել։
Կապանում արդեն նշանակվել է Իրանի գլխավոր հյուպատոսը:
Պաղեստինյան «Իսլամական ջիհադ» շարժումը շուրջ 1000 հրթիռ Է արձակել Իսրայելի տարածքի ուղղությամբ իրադրության վերջին սրման ժամանակ: Հրթիռներից մոտավորապես 200-ն ընկել են Գազայի հատվածի տարածքում:
Թուրքական ԶԼՄ-ները գրել են, որ 10 տարվա մեջ առաջին անգամ հնարավոր է Թուրքիայի և Սիրիայի նախագահներ Ռեջեփ Էրդողանը և Բաշար Ալ-Ասադը հեռախոսազրույց ունենան:
Իսկ Թուրքիայի ԱԳ նախարար Մևլութ Չավուշօղլուն հայտարարել է, որ անցյալ տարի հոկտեմբերին Բելգրադում կայացած Չմիավորման շարժման գագաթաժողովի շրջանակներում կարճատև զրույց է ունեցել Սիրիայի արտգործնախարար Ֆեյսալ Միկդադի հետ: Այս հայտարարությունը վրդովմունք է առաջացրել Սիրիայի ընդդիմադիրների շրջանում, որոնց վերոնշյալը դավաճանություն են որակել:
Թուրքիայի արտգործնախարարության անանուն բարձրաստիճան պաշտոնյան էլ մեկնաբանել էր Թուրքիա-Հայաստան կարգավորման գործընթացը: Թուրքական լրատվամիջոցները չեն հրապարակել այդ պաշտոնյայի անուն-ազգանունը։
Սիրիայի անվտանգության ուժերը «հատուկ գործողություն» են իրականացրել, որի արդյունքում սպանվել է «Իսլամական պետություն» ահաբեկչական կազմակերպության ռազմական ղեկավար Աբու Սալեմ Ալ-Իրաքին:
Իրաքում մեկնարկել է Մոսուլի միջազգային օդանավակայանի վերակառուցման գործընթացը: Նախատեսվում է, որ այն շահագործման կհանձնվի 24 ամսից:
Հայաստանի վարչապետ Նիկոլ Փաշինյանը հեռախոսազրույց է ունեցել Իրանի նախագահ Էբրահիմ Ռայիսիի հետ։ Ռայիսին հայտարարել է, որ Իրանը տարածաշրջանի աշխարհաքաղաքականությունում որևէ փոփոխություն չի ընդունի:
Եվ վերջում առանձնացրել ենք փորձագետների տեսակետները տարածաշրջանային զարգացումների վերաբերյալ:
Հետևեք մեզ տելեգրամում
