Եգիպտոսի Գիզա քաղաքի ղպտի եկեղեցում հրդեհ է բռնկվել, որի հետևանքով զոհվել է 41 մարդ, վիրավորվել՝ ևս 45-ը, գրում է Reuters-ը:
Հաղորդվում է, որ երեկ Աբու Սեֆեյն եկեղեցում Եգիպտոսի ժամանակով առավոտյան ժամը 9:00-ին հրդեհ է բռնկվել: Եկեղեցում հավաքվել էր 5000 մարդ՝ պատարագի մասնակցելու:
Եգիպտոսի ներքին գործերի նախարարության հայտարարության համաձայն՝ դատաբժշկական փորձաքննությունը ցույց է տվել, որ հրդեհը բռնկվել է երկրորդ հարկի օդորակիչում՝ էլեկտրական անսարքության հետևանքով:
Նշվում է, որ մահացության հիմնական պատճառը ծխի ներթափանցումն է եղել: Մահացածների ընտանիքները կստանան 100,000 եգիպտական ֆունտ (5,220 դոլար), ասվում է կառավարության հայտարարության մեջ:
Իսկ Կահիրեում ՀՀ դեսպան Հրաչյա Փոլադյանը ցավակցություն է հայտնել հրդեհի հետևանքով զոհվածների ընտանիքներին՝ վիրավորներին մաղթելով շուտափույթ ապաքինում:
Հետևեք մեզ տելեգրամում
